Լրագրողները պետք է բոյկոտեն ԱԺ-ն, կառավարությունը. Վարուժան Ավետիսյան

«Հիմնադիր խորհրդարանի» փոխնախագահ Վարուժան Ավետիսյանի կարծիքով` լրագրողները պետք է բոյկոտեն Ազգային ժողովի, կառավարության աշխատանքները։ ԼՈՒՐԵՐ.com-ի հետ զրույցում անդրադառնալով ԱԺ պատգամավոր Մհեր Սեդրակյանի և լրագրողների միջև տեղի ունեցած միջադեպին` նման տեսակետ հայտնեց ՀԽ փոխնախագահը։

«Իհարկե, «Հիմնադիր խորհրդարանը» նիստ չի գումարել այդ հարցով, բայց կարող եմ ասել, որ մարդկային առումով դատապարտելի է։ Մենք պետք է հասկանանք, թե ինչպես ստացվեց, որ նման մարդիկ հայտնվեցին երկիրը կառավարողների շարքերում և հիմա վիրավորում են լրագրողներին։ Այդ հարցը լուծելու գործում լուրջ դերակատարում ունեն նաև լրագրողները։ Նրանք չպետք է դիմեն ԱԺ-ին, պատգամավորներին, կառավարության անդամներին, նրանցից հարցերի պատասխաններ չակնկալեն։ Նրանք պատերազմ են հայտարարել մեր ժողովրդին։ Ինչպե՞ս կարելի է նրանց հետ հանգիստ, խաղաղ ձևաչափով աշխատել` նրանց դիմելով «պարոն այսինչ պատգամավոր» և այլն»,- ասաց Վարուժան Ավետիսյանը։

Ըստ նրա՝ լրագրողների սկսած ստորագրահավաքը և պահանջը Մհեր Սեդրակյանից` վայր դնել մանդատը, արդյունավետ չէ։ «Ես ինքս արդյունավետ չեմ համարում դա։ Չնայած` քաջալերում եմ։ Մենք չենք կարող այս ձևերով արդյունքի հասնել։ Ումի՞ց են հրաժարական պահանջում։ Մհեր Սեդրակյանից պահանջում են, որ վայր դնի մանդատը։ Եթե մենք նորմալ հասարակության մեջ ապրեինք, ապա դա հնարավոր կլիներ։ Բայց մենք լրիվ ուրիշ իրավիճակի հետ գործ ունենք»,- ավելացրեց ՀԽ փոխնախագահ Վարուժան Ավետիսյանը։

Հիշեցնենք, որ ԱԺ պատգամավոր Մհեր Սեդրակյանը լրագրողներին անվանել էր «նախիր», ինչին ի պատասխան` լրագրողները սկսել են ստորագրահավաք։ Վաղն էլ նախատեսվում է բողոքի ակցիա իրականացնել։