Միայն փարթամակուրծք շիկահերներ...

Պահանջվում են բարետես արտաքինով աշխատակիցներ՝ 22-25 կամ լավագույն դեպքում 30 տարեկան, պարտադիր աշխատանքային փորձով, լեզուների կատարյալ իմացությամբ, համակարգչային գիտելիքներով, մարդկանց հետ շփվելու ունակությամբ։ Հայաստանում աշխատանք գտնելու համար ամենաքիչը պետք է այս պահանջները բավարարել, և կապ չունի, թե ինչ ոլորտում ես աշխատանք փնտրում, հակառակ դեպքում՝ կհամալրես գործազուրկների շարքը, ինչի պակասը Հայաստանում չկա։

«Նաիրիտ» գործարանի՝ աշխատանքից ազատված աշխատակիցներից Տիգրան Մինասյանն արդեն մի քանի ամիս է՝ բախվում է աշխատանք չգտնելու խնդրին։ Վերջինս գործարանում աշխատել է որպես մեխանիկական արտ. փականագործ (слесарь)։ Այժմ ցանկացած աշխատանք պատրաստ է կատարել։ Բայց բախվում է տարիքային սահմանափակման խնդրին։ Հայաստանում գործատուները պահանջում են մինչև 30 տարեկան, չափազանց բարետես արտաքինով աշխատողներ։ Տիգրանն անցած տարի աշխատանքի մի քանի տեղեր է դիմել. «Գրանդ Քենդի»-ում, «Գրանդ Տոբակո»-ում, «Իմեքս Գրուպ»-ում և մի շարք այլ ընկերություններում աշխատանք է փնտրել, սակայն ապարդյուն։ «Մենք ձեզ կզանգահարենք»։ Բոլոր տեղերում այս նախադասությունն է եղել վերջինը. կամ՝ «Ձեր տարիքը չի համապատասխանում մեր պահանջներին»։ «Շատ տեղեր եմ դիմել։ Կա՛մ տարիքն է բարձր, կա՛մ աշխատանքի տեղ չունեն, կա՛մ էլ ասում են կզանգահարենք ու էդպես էլ չեն զանգահարում։ Բավական ժամանակ է, ինչ աշխատանք եմ փնտրում, բայց անօգուտ, տարիքային սահմանափակումը թույլ չի տալիս գործ գտնել»,- ԼՈՒՐԵՐ.com-ի հետ զրույցում ցավով նշեց Տիգրանը։

Տիգրան Մինասյանը, ցավոք, այն շատերից մեկն է, ով ամեն օր բախվում է այս խնդրին։ «Նաիրիտից» ազատվելուց հետո աշխատանք գտնելը դարձել է անհնար։ Այսօրվա Հայաստանում շատերն ունեն այս խնդիրը: Անգամ բանվորի կամ հավաքարարի աշխատանքի համար պահանջում են լինել բարետես, երիտասարդ և լեզուների իմացությամբ: Եթե 40 տարեկան ես ու աշխատանք չունես, ապա կարելի է մոռանալ, որ ինչ-որ ընկերություն քեզ աշխատանքի կընդունի։ Դե, եկ վարդապետ ու մի խենթանա: