Գրպանված միլիոններ՝ Ասատրյանի «քթի տակից»

Շարունակվում է ՀՀ Վերահսկիչ պալատի կողմից կատարած ուսումնասիրությունների արդյունքների հրապարակումը, որոնք բավական մեծ թվով փակագծեր են բացում: Ստուգումներ իրականացնելով սոցիալական ծառայություններ տրամադրող տարածքային գործակալություններում՝ ՀՀ պետական բյուջեով նախատեսված ընտանեկան և սոցիալական նպաստների, հրատապ դրամական օգնության և մինչև 2 տարեկան երեխայի խնամքի նպաստի նշանակման գործընթացների հետ կապված, ՎՊ-ն պարզել է, որ, օրինակ, Կոտայքի և Արագածոտնի մարզպետարանների ենթակայության 8 գործակալությունում արձանագրվել է 571 դեպք՝ 105 մլն 599.5 հազար դրամ գումարի չափով:

Կամ՝ բանից պարզվում է, որ շատ դեպքերում ՀՀ աշխատանքի և սոցիալական հարցերի նախարարության և «Նորք» տեղեկատվավերլուծական կենտրոնի կողմից հարակից բազաներով գործակալություններին տրամադրված տեղեկատվությունը ժամանակին և ամբողջությամբ համակարգ չի մուտքագրվել և սահմանված կարգով նպաստի վճարումը չի դադարեցվել, տրամադրված տեղեկատվությունը որոշ դեպքերում կրկնվել է 2-3 անգամ, սակայն այն գործակալությունների կողմից համակարգ չի մուտքագրվել կամ չի իրացվել: Ավելին ասենք՝ նպաստառու ընտանիքների կազմի, բնակարանային պայմանների, բնակության վայրի ճշտության ստուգման արդյունքում հայտնաբերվել է 98 խախտում՝ ընդհանուր 20 մլն 214 հազար դրամի:

Այս ամենը, ինչպես կռահում եք, միայն մի մասն է այն չարաշահումների ու խախտումների, որ ֆիկսել է Վերահսկիչ պալատն իր ուսումնասիրություններում, որոնցից տպավորություն է ստեղծվում, որ ՀՀ աշխատանքի և սոցիալական հարցերի նախարարությունում կարծես չեն վերահսկում սեփական ենթակայության տակ գտնվող կառույցների գործունեությունը և լիովին անտարբեր են այն ամենի նկատմամբ, ինչ տեղի է ունենում այս պետական կառույցից ներս: 

Տեսնես՝ Արտեմ Ասատրյանին արդեն զեկուցե՞լ են, թե ինչով են, սովորաբար, աշխատանքային օրերին զբաղված լինում իր ենթակաները: Զեկուցե՞լ են, տեսնես, որ իր անտարբերության ու թողտվության արդյունքում փաստացի միլիոնավոր դոլարներ են փոշիանում պետական բյուջեից: Իսկ միգուցե նա շատ լավ էլ տեղյա՞կ էր այն ամենի մասին, ինչի մասին, որ այս հոդվածում հիշատակվում է…

Զարմանալի է՝ մի՞թե մարդիկ չեն հասկանում, որ իրենց անփությության ու աշխատանքային փնթիության արդյունքում տուժում է ոչ միայն երկրի բյուջեն, այլև վարկաբեկվում է ողջ պետական համակարգը՝ ծայրից ծայր: Համաձայնե՛ք, որ Սոցիալական հարցերի նախարարությունն այն քիչ պետական կառույցներից է, որի հետ շատ հաճախ անմիջականորեն շփում է հաստատում հասարակ քաղաքացին, որի հետ են կապվում երկրի, պետության սոցիալական քաղաքականության հիմնական անցքերը:

Հետո էլ խոսում ենք կոռուպցիայի, չարաշահումների ու էլի նման վատ-վատ բաների կանխարգելման ու վերացման մասին. տեսնում ենք՝ ինչպես են պայքարում… Ցավոք, երկրում վաղուց ձևավորվել է մի մթնոլորտ, երբ նմանատիպ տեղեկություններով ոչ մեկին չես զարմացնի այլևս, երբ մարդկանց համար շատ սովորական մի բան է դարձել պետական այս կամ այն կառույցների կողմից պետական բյուջեի ակնհայտ թալանը: Հուսանք՝ բացահայտումների արդյունքում կհաջողվի պատասխանատվության ենթարկել նրանց, ովքեր անմիջականորեն կապ են ունեցել այդ գործերի հետ, կհաջողվի գտնել կոնրետ մեղավորների:

Դավիթ Բաբանով