Գառնեցիները կրկին փակել են ճանապարհը. Հովիկ Աբրահամյանը ժամանել է (թարմացված, տեսանյութ)

Գառնեցիները վաղ առավոտից կրկին փակել են Գառնի-Երևան ավտոճանապարհը: Նրանք շարունակում են պահանջել չեղյալ համարել Քաղցրաշենի ինքնահոս ոռոգման ծրագիրը և տեխնիկան դուրս բերել Ազատ գետի կիրճից: ԼՈՒՐԵՐ.com-ի թղթակցի փոխանցմամբ՝ գլխավոր մայրուղուց բացի, գառնեցիները փակել են նաև երկրորդական ճանապարհը:

Ճանապարհը փակել են մեքենայով, որն էլ ոստիկանները դուրս բերեցին ճանապարհից, որպեսզի գոնե այդ ճանապարհով հնարավոր լինի երթևեկություն իրականացնել: Գառնեցիները նշում են, որ սա անժամկետ նստացույց-ակցիա է, քանի դեռ իրենց պահանջները չեն բավարարվել:

Այդ ծրագրով նախատեսվում է Ազատ գետի ջուրը տեղափոխել Արարատի մարզի 12 գյուղ, որտեղ, գառնեցիների խոսքով, վարչապետ Հովիկ Աբրահամյանի և մի շարք այլ օլիգարխներին պատկանող այգիներն են:

Գառնեցիները պահանջում են Հովիկ Աբրահամյանի հրաժարականը: Նշվում  է, որ այսօր՝ ժամը 16:00-ին, վարչապետ Հովիկ Աբրահամյանը կլինի Գառնիում և տեղում գառնեցիների հարցերին կպատասխանի: 

Ավելի ուշ վարչապետը ժամանել է Գառնի, սակայն գյուղացիները չեն հրաժարվում ճանապարհը փակելու մտքից և մինչ այս պահը այն փակ է: