Ամերիկացիների նախազգուշացումը` Հովիկ Աբրահամյանին

Հայաստանում արմատացած կոռուպցիայի, գործարար անհավասար դաշտի ու պայմանների, մեր երկրում բիզնեսով զբաղվելու համար ստեղծված արհեստական խոչընդոտների վերաբերյալ Արևմուտքի ունեցած կարծիքն ու դիրքորոշումը միշտ էլ հայտնի է եղել բոլորին. այն, որպես կանոն, խիստ նեգատիվ ու անգամ դատապարտողական բնույթ է կրել, ինչն էլ հանդիսացել է այն հիմնական խոչընդոտն ու արգելքը, որ թույլ չի տվել մեր երկիր ներգրավել, եթե չասենք մեծածավալ, ապա գոնե բավարար չափի արտասահմանյան ներդրումներ, ինչի արդյունքում էլ արդեն բավական երկար տարիներ է, ինչ Հայաստանի տնտեսութունը հայտնվել է լճացման մեջ, ու գրեթե ոչինչ այստեղ չի զարգանում:

Երևանում տեղի ունեցած «ԱՄՆ գործարար ճեպազրույց. Հայաստան» համաժողովի ընթացքում Հայաստանում ԱՄՆ դեսպան Ռիչարդ Միլսը, անդրադառնալով Հայաստանում տիրող բիզնես միջավայրին, հանդես է եկել մի ուշագրավ հայտարարությամբ, որն իր խորությամբ բավական ուշագրավ է: Չնայած դեսպանն իր երկրի գործարարներին կոչ է արել գալ ու ներդրումներ անել Հայաստանում, սակայն չի վարանել միևնույն ժամանակ նախազգուշացնել, որ ինչպես նախկին խորհրդային տարածքի մյուս երկրներում, այնպես էլ Հայաստանում նրանք բախվելու են կոռուպցիայի հետ, ուստի՝ ամերիկացի գործարարները ստիպված են լինելու զգոն լինել ու չանտեսել այս խիստ բացասական գործոնը: Դեսպանն ուղղակիորեն հայտարարել է. «Դեսպանությունն ամեն ինչով աջակցելու է, որ ձեզ համար հավասար հնարավորություններ ստեղծվեն»:

Վերլուծելով բարձրաստիճան դիվանագետի խոսքը՝ ուղղված իր հայրենակիցներին, պետք է աներկբայորեն փաստենք, որ դեսպանի խոսքն ուղղված է եղել ոչ այնքան ամերիկացիներին, որքան՝ ՀՀ վարչապետ Հովիկ Աբրահամյանին, ում՝ օրեր առաջ արած հայտարարությունը, թե կառավարությունը այսուհետ անելու է իրենից կախված ամեն ինչ՝ ՀՀ-ում լայն տարածում գտած կոռուպցիան, մենաշնորհն ու ամենաթողությունը արմատախիլ անելու, իսկական աժիոտաժ է առաջացրել երկրում: Դատելով, սակայն, Միլսի խոսքի տոնայնությունից ու անթաքույց շեշտադրումներից՝ պետք է նկատենք, որ վերջինս, ի տարբերություն ոմանց, այնքան էլ հակված չէ հավատալ Աբրահամյանի անկեղծությանն ու լինելով նախևառաջ իր երկրի հայրենասեր քաղաքացի՝ սեփական պարտքն է համարել՝ համապատասխան նախազգուշացմամբ հանդես գալ' ուղղված ամերիկացի գործարարներին. ամենաթողությունն ու կոռուպցիան վերացնելու մասին երդումներ շատ են եղել, որոնք ոչ մի էական փոփոխության չեն հանգեցրել Հայաստանում:

Իսկ այն, որ Միլսի կասկածամտությունն ամենևին էլ անտեղի չէ, կարող է փաստել հենց ինքը՝ Վահրամ Բաղդասարյանը, ով հայտարարել է բառացիորեն հետևյալը. «Ո՞վ է տեսել կոռուցիայի դեմ արագ պայքարեն. արագությունը միայն ոջիլ բռնելու ժամանակ է լավ…»: Թե ինչ կապ ունի ոջիլը ՀՀ տնտեսության հետ, իհարկե, երևում է' գիտի միայն Բաղդասարյանը, բայց որ նմանատիպ քամահրական տոնով արտահայտվելը կարող է վկայել միայն անլրջության մասին, կարծում ենք, կհամաձայնեք բոլորդ. մի՞թե սա է վարչապետի՝ կոռուպցիայի դեմ պայքարի մասին վերամբարձ ելույթի հիմնական ուղերձը, մի՞թե ոջիլն ու անիծն են կառավարության մեսիջները՝ ուղղված սեփական ժողովրդին ու ոչ միայն… Հետո էլ տարակուսում ենք, թե ինչու Հայաստանում օտարերկրյա ներդրումներ չեն արվում: Է՛, ինչպե՞ս արվեն, երբ կոռուպցիաի ու ամենաթողության դեմ պայքարը բարձրաստիճան պաշտոնյան համեմատում է ոջիլ սատկացնելու հետ. այսքանից հետո է՛լ ո՞վ պետք է լուրջ վերաբերվի Հայաստանին, Բաղդասարյան Վահրամը կարո՞ղ է մեզ պատասխանել.դժվար թե… 

Դավիթ Բաբանով