Միգուցե մեր պաշտոնյաների արյունը կապու՞յտ է

Ու նորից չարաբաստիկ ծառայողական մեքենաների մասին, որովհետև ՀՀԿ-ական պատգամավորներն իրենց «յուրահատուկ» մտքերով ստիպում են, որ մենք նորից անդրադառնանք այս թեմային: Հիմա էլ ԱԺ ՀՀԿ խմբակցության քարտուղար Գագիկ Մելիքյանն է մեկնաբանել վարչապետ Հովիկ Աբրահամյանի` գոտիները ձգելու անհրաժեշտության մասին արտահայտությունը: Մելիքյանը գտնում է, թե «գոտիները ձգել» չի նշանակում, որ պաշտոնյաները պետք է ամենացածր դասի մեքենաներով շրջեն: Հետաքրքիր է` ինչու՞: օրինակ, ի՞նչ կլինի, եթե պաշտոնյաները շրջեն թեկուզ 3-5 հազար դոլար արժողությամբ մեքենաներով, որևէ մեկի հետույքը կմաշվի՞. վստահ եմ, որ ոչ, քանի որ ավտոմեքենան ընդամենը փոխադրամիջոց է: Կամ թեկուզ հասարակական տրանսպորտով և հեծանիվով երթևեկելու դեպքում ի՞նչ կլինի պաշտոնյաների հետ, նրանց մարմնի որևէ հատված կմաշվի՞. իհարկե, ոչ:

Որպեսզի ասածներս ՀՀԿ խմբակցության քարտուղարի համար ավելի հիմնավոր լինեն, բերեմ ընդամենը 1-2 օրինակ համաշխարհային փորձից: Ուրուգվայի նախկին նախագահ Խոսե Մուխիկոյի ավտոմեքենան 1987 թ-ի արտադրության Volkswagen Beetle էր, բայց դա ամենևին չխանգարեց Մուխիկոյին լինել լավ նախագահ իր երկրի համար, ընդ որում` նախագահ, այլ ոչ թե սովորական պաշտոնյա: Իսկ Մեծ Բրիտանիայի նման հզոր պետության վարչապետ Դևիդ Քեմերոնը երբեմն աշխատանքի է գնում մետրոյով' նույնիսկ կանգնած երթևեկելով: Քեմերոնն էլ է պաշտոնյա, ընդ որում շատ ավելի լուրջ պաշտոնյա, քան մեր հայ պաշտոնյաներից շատերը, ովքեր իրենց պատվից ցածր են համարում ցածր դասի մեքենաներով շրջել:

Նման պաշտոնյաները շատ են, ես մեջբերեմ ևս մի քանիսի անունները, ովքեր շրջել կամ շրջում են ընդամենը հեծանիվով. Լոնդոնի նախկին քաղաքապետ Բորիս Ջոնսոնը, Հարավային Կորեայի նախկին նախագահ Լի Մեն Բակը, Չեխիայի Հանրապետության արդարադատության նախարար Ռոբերտ Պելիկանը, Կիևի քաղաքապետ Վիտալի Կլիչկոն, Ավստրալիայի նախկին վարչապետ Տոնի Էբբոտը, Չեխիայի նախագահ Վացլավ Կլաուսը և այլք: Այս մարդիկ էլ պաշտոնյաներ են և հայ պաշտոնյաներից ոչնչով պակաս չեն, թե՞ միգուցե ես սխալ գիտեմ: Միգուցե մեր պաշտոնայների արյունը կապու՞յտ է, թագավորակա՞ն…

Կարեն Վարդանյան