Թե ինչպես և ինչու է հիվանդը զորակոչվել բանակ

Երբ համապատասխան պաշտոնյան կամ մասնագետը հիվանդին հիվանդ չի ճանաչել, համարել է զինվորական ծառայության համար պիտանի, ինչի հետևանքով վերջինիս բանակ են զորակոչել, դա ի՞նչ է, այսինքն' նրա տվյալ արարքն ինչպե՞ս բնութագրել: Դե, ըստ քննիչի, Լոռու կայազորի զինվորական դատախազության, անփութություն է…

Քրեական գործի նախաքննությամբ պարզվել է, որ Սերոբ Նազարեթյանը հանդիսանալով պաշտոնատար անձ, ընդգրկված լինելով Թումանյանի զինկոմիսարիատի զորակոչային հանձնաժողովի կազմում, օժտված է եղել ժամկետային պարտադիր զինվորական ծառայության զորակոչի ընթացքում զորակոչային տարիքի հասած, զինկոմիսարիատ կանչված և մաշկավեներական խնդիրներ ունեցող արական սեռի ՀՀ քաղաքացիներին և նրանց առողջական վիճակի վերաբերյալ ակտերը հետազոտելու և եզրակացություն տալու իրավասությամբ:

Ըստ մեղադրական եզրակացության, Ս. Նազարեթյանը 2015թ. ամառային զորակոչի ընթացքում ծառայության նկատմամբ դրսևորելով անփույթ վերաբերմունք, պարտականությունները կատարել է ոչ պատշաճ' Հ. Բաղդասարյանի մոտ ախտորոշված «Բրոկի պսևդոպելադիա» հիվանդությունը չգտնելով, առանց բավարար հիմքերի, այն նույնացրել է օջախային մազաթափության հետ, և իրավաբանական փաստի ուժ ունեցող եզրակացություն է կազմել' Հ. Բաղդասարյանին շարային ծառայությանը պիտանի ճանաչելու մասին:

Թումանյանի զինկոմիսարիատի բժշկական հանձնաժողովը վերոնշյալ եզրակացության հիման վրա հաստատել է Հ. Բաղդասարյանի զինծառայության համար պիտանի լինելու հանգամանքը, վերջինս 12.07.2015 թ. հուլիսի 12-ին զորակոչվել է ՀՀ զինված ուժեր և մինչև զորացրվելը ծառայել է ՀՀ ԶՈՒ-ում շուրջ 3 ամիս, ինչի հետևանքով վերջինիս իրավունքներին անզգուշությամբ պատճառվել է էական վնաս:
Վերը նշված արարքի համար Սերոբ Նազարեթյանին մեղադրանք է առաջադրվել ՀՀ քրեական օրենսգրքի 315-րդ հոդվածի («Պաշտոնեական անփութությունը») 1-ին մասի հատկանիշով: