Եկել է անտառը պահպանողներին զինելու ժամանակը

Համարելը, թե պետական, համաժողովրդական սեփականություն հանդիսացող անտառն իր անձնական սեփականությունն է և ինչպես ցանկանա վարվել ծառերի հետ, այնպես էլ կվարվի, ապօրինի հատած փայտն անտառից դուրս հանելու ընթացքում բռնվելիս, այն թողնելու, ներողություն խնդրելու փոխարեն, անտառապահի կամ անտառապետի հետ վեճի բռնվելն ու նրա վրա հարձակվելն առնվազն ցինիզմ ու լկտիություն են, վերջին տարիների ընթացքում, ցավոք, ոչ եզակի: Թերևս ժամանակն է անտառի առավել կարևոր կամ վտանգավոր, ռիսկային տեղամասերում անտառի պահպանություն իրականացնողներին տաբելային ատրճանակ տրամադրելու:

Քրեական գործի նախաքննության ընթացքում պարզվել է, որ Ավետիկ Պապանյանը 2015թ. հոկտեմբերի 2-ին, ժամը 11:00-ից 11:30-ը ժամանակահատվածում Հայանտառ ՊՈԱԿ-ի Ստեփանավանի անտառտնտեսության մասնաճյուղի Գյուլագարակի անտառպետության 4-րդ պահաբաժնում, իր կողմից ապօրինի հատած ծառերի փայտանյութն անտառից սայլով դուրս բերելիս, վեճի է բռնվել իր հակաիրավական գործողությունը կանխող, անտառապետ Կ. Դոխոլյանի հետ: Այդ ընթացքում, ըստ մեղադրական եզրակացության, Ա. Պապանյանը փայտով և ձեռքերով բազմաթիվ հարվածներ է հասցրել Կ. Դոխոլյանի մարմնի տարբեր մասերին՝ դիտավորությամբ նրա առողջությանը պատճառելով կյանքին վտանգ սպառանցող ծանր վնաս:

Վերը նշված արարքի համար Ավետիկ Պապանյանին մեղադրանք է առաջադրվել ՀՀ քրեական օրենսգրքի 112-րդ հոդվածի («Դիտավորությամբ առողջությանը ծանր վնաս պատճառելը») 2-րդ մասի 2-րդ կետի հատկանիշով, որպես խափանման միջոց ընտրվել է կալանքը: Թե, սրան զուգահեռ, ինչու մեղադրանք չի առաջադրվել ապօրինի անտառահատման համար, դեռ չգիտենք: