Հիվանդներին տարել են բանակ, առողջին ազատել կամ փորձել ազատել զինվորական ծառայությունից. քրեական սկանդալ

«Խաթարվել է զինվորական ղեկավար մարմինների գործունեության բնականոն ընթացքը, հեղինակազրկվել են զինվորական իշխանության մարմինները» վերտառությամբ մեր երեկվա հրապարակմամբ անդրադարձել էինք զինկոմիսարիատի զորակոչային հանձնաժողովի կազմում ընդգրկված բժշկի կողմից հիվանդ երիտասարդին, ըստ մեղադրական եզրակացության, պաշտոնեական անփութության հետևանքով սխալ եզրակացություն (իբր թե առողջ է) տալու դեպքին: Հենց դրա հետևանքով էլ զորակոչի ոչ ենթակա Նվեր Հովհաննիսյանին բանակ էին զորակոչել, խախտել նրա սահմանադրական իրավունքները, իսկ հետո արդեն ստիպված եղել զորացրել: Իրավապահներն էլ խոստովանել-արձանագրել էին, որ տվյալ սխալով և հանցանքով պետության և հասարակության շահերին պատճառվել է էական վնաս:

Ցավոք, այսպիսի դեպքերը եզակի չեն, կարելի է ասել, որ վերը ներկայացվածն ընդամենը հերթական դեպքն է, բացահայտված ու չբացահայտված բազմաթիվ դեպքերից ընդամենը մեկը: Կան նաև դեպքեր, երբ զինապարտների հետազոտության և փորձաքննություն իրականացնող բժշկական հանձնաժողովի անդամ հանդիսացող բժիշկները կաշառք են վերցրել զինվորական ծառայության համար պիտանի երիտասարդին նշված ծառայությունից ազատվելու նպատակով հիվանդ լինելու վերաբերյալ կեղծ եզրակացություն տալու համար: Այսպիսի դեպքերը նույնպես քիչ չեն, սակայն նմանաբնույթ բազմաթիվ դեպքերի սոսկ չնչին մասն է բացահայտվում: Բացահայտվածներից մեկն էլ ստորև ներկայացվողն է:

Քրեական գործի նախաքննությամբ պարզվել է, որ Քրիստինա Ջամալյանն աշխատելով «Էրեբունի» ԲԿ-ում որպես ալերգոլոգիական ծառայության ղեկավար, հանդիսանալով զինապարտների հետազոտության և փորձաքննություն իրականացնող բժշկական հանձնաժողովի անդամ, պաշտոնատար անձ, կաշառքի դիմաց զորակոչիկ Մ. Խաչատրյանի վերաբերյալ տարեկետման իրավունք վերապահող հետազոտման ակտ տալու և տարեկետում տրամադրելու հետագա գործընթացը կազմակերպելու հարցի շուրջ 2014թ. դեկտեմբերի սկզբին համաձայնություն է ձեռք բերել միջնորդ Ա. Բաբայանի հետ: Ըստ մեղադրական եզրակացության, Ք. Ջամալյանը նրա միջոցով պահանջել է առանձնապես խոշոր չափի' 1 331 490 դրամին համարժեք 3000 ԱՄՆ դոլար կաշառք, այնուհետև պայմանավորվել է կաշառքի գումարը եղբորը' Էդգար Ջամալյանին հանձնելու վերաբերյալ և 2014թ. դեկտեմբերի 8-ին վերջինիս օժանդակությամբ ստացել է այդ գումարից 220 000 դրամը:

Նույն քր, գործի շրջանակում մեղադրանք է առաջադրվել նաև Էդգար Ջամալյանին այն բանի համար, որ նա 2014թ. դեկտեմբերի 8-ին օժանդակել է իր քրոջը' Ք. Ջամալյանին, առանձնապես խոշոր չափի կաշառք ստանալու մեջ:

Սույն քր. գործով հաջորդ մեղադրյալը, համաձայն քր. գործի նյութերի, միջնորդն է' Ալեն Բաբայանը: Վերջինս, ինչպես պարզվել է նախաքննությամբ, նպաստել է հիշյալ կաշառքի դիմաց զորակոչիկ Մ. Խաչատրյանի վերաբերյալ տարեկետման իրավունք վերապահող հետազոտման ակտ տալու և տարեկետում տրամադրելու հետագա գործընթացը կազմակերպելու համար վերջինիս հայր Սամսոն Խաչատրյանի և Ք. Ջամալյանի միջև համաձայնության գալուն, ապա 2014թ. դեկտեմբերի սկզբին Ս. Խաչատրյանից վերցրել է 1 331 490 դրամին համարժեք 3000 ԱՄՆ դոլար, որից 220 000 դրամը Ք. Ջամալյանին փոխանցելու համար 2014թ. դեկտեմբերի 8-ին տվել է Է. Ջամալյանին:

Քրեական պատասխանատվության է կանչվել նաև զորակոչիկի հայրը: Սամսոն Խաչատրյանին մեղադրանք է առաջադրվել այն բանի համար, որ նա «Էրեբունի» ԲԿ-ի զինապարտների հետազոտության և փորձաքննություն իրականացնող բժշկական հանձնաժողովի կողմից որդու վերաբերյալ տարկետման իրավունք վերապահող հետազոտման ակտ տալու և տարեկետում տրամադրելու հետագա գործընթացը կազմակերպելու համար 2014թ. դեկտեմբերի սկզբին միջնորդ Ա. Բաբայանին է տվել է հիշյալ կաշառքը:

Բժշկական համակարգում կոռուպցիոն բնույթի այսպիսի հանցագործության մասշտաբները, սակայն, ինպես երևում է մեղադրական եզրակացությունից, ավելի մեծ են եղել: Ուշագրավ է այն հանգամանքը, որ հենց նույն քր. գործի շրջանակում մեղադրանք է առաջադրվել նաև Երևանի բժշկական համալսարանի թերապիայի թիվ 1 ամբիոնի վարիչ, կենտրոնական բժշկական հանձնաժողովի անդամ Ալեքսանդր Այվազյանին: Նախաքննությամբ պարզվել է, որ նա զբաղեցնելով հիշյալ պաշտոնը և ընդգրկված լինելով կենտրոնական բժշկական հանձնաժողովի կազմում, հանդիսանալով պաշտոնատար անձ, «Էրեբունի» ԲԿ-ի բուժքույր Գ. Ղուկասյանից, վերջինիս աշխատասենյակում պահանջել է խոշոր չափի' 688 950 դրամին համարժեք 1500 ԱՄՆ դոլար կաշառք:

Վերը նշված արարքների համար Քրիստինա Ջամալյանին մեղադրանք է առաջադրվել ՀՀ քրեական օրենսգրքի 311-րդ հոդվածի («Կաշառք ստանալը») 4-րդ մասի 2-րդ կետի, Էդգար Ջամալյանին' 38-311-րդ հոդվածի (կաշառք ստանալուն օժանդակելը) 4-րդ մասի 2-րդ կետի, Ալեն Բաբայանին' 313-րդ հոդվածի («Կաշառքի միջնորդությունը») 1-ին մասի, Սամսոն Խաչատրյանին' 312-րդ հոդվածի («Կաշառք տալը») 3-րդ մասի 1-ին կետի, Ալեքսանդր Այվազյանին' 311-րդ հոդվածի 3-րդ մասի 3-րդ կետի հատկանիշներով: