Ես իմ առաջին հեծանիվը հիշում եմ. Վահրամ Բաղդասարյանը մտովի տեղափոխվեց մանկություն

«Փոքր ժամանակ բոլորս երազում էինք հեծանիվ ունենալ, մեր ձեռքերով էինք սարքում։ Հեծանիվի համար հերթագրվում էինք, որ վայելենք»։ Այսօր Ազգային ժողովի բակում հունիսի 1-ի՝ երեխաների պաշտպանության միջազգային օրվա կապակցությամբ, լրագրողների հետ զրույցում մտովի մանկություն տեղափոխվեց ՀՀ ԱԺ ՀՀԿ խմբակցության ղեկավար Վահրամ Բաղդասարյանը։ 

«Հիմա մտածում եմ՝ ինչն էր ավելի հետաքրքիր։ Կարծում եմ՝ ինչը դժվարությամբ ես ձեռք բերում, մնում է հուշերի մեջ։ Հիմա որևէ երեխա, տարիներ հետո, չի հիշելու, որ ինքը հեծանիվ է ունեցել։ Բայց ես իմ առաջին  հեծանիվը հիշում եմ, որովհետև այն եզակի է եղել»,- պատմեց Վահրամ Բաղդասարյանը։ 

Վերջինս նշեց, որ ինքը մանկուց երազել է մաթեմատիկայով զբաղվել. «Մանկական երազանքներս շատ են եղել։ Ես մի բան էի երազում՝ մեծանալ, այնպես անել, որ փոխհատուցեմ իմ ծնողներին։ հայրիկիս պահով, ցավոք, չհասցրի։ Այնուհետև ես ուզում էի մաթեմատիկայով զբաղվել, այդպես էլ եղավ, հետագայում տնտեսագետ դարձա։ Իսկ պաշտոն չեմ երազել։ Ավելի շատ ինձ գիտության ոլորտում էի պատկերացնում։ Մայրս շատ էր ուրախացել, երբ ես դոկտորականս պաշտպանեցի։ Ոչ մի անգամ չի ուրախացել, որ պաշտոնների եմ եղել, պատգամավոր եմ դարձել։ Երազել էի ունենալ 7 երեխա, բայց ունեցա 4-ը»,- ասաց ՀՀԿ խմբակցության ղեկավարը։