Հայաստանն ու Իրանը մտադիր են օտարերկրացի զբոսաշրջիկներին առաջարկել տարածաշրջանային տուրփաթեթներ

Հայաստանի ու Իրանի միջև առանց վիզայի ռեժիմ ակտիվություն կհաղորդի զբոսաշրջային փոխայցերին: Այս մասին «Արմենպրես»-ի հետ զրույցում նշեց Էկոնոմիկայի նախարարության Զբոսաշրջության վարչության պետ Մեխակ Ապրեսյանը:

«Նախ ասենք, որ առանց վիզայի ռեժիմը դրական է ոչ միայն զբոսաշրջության ոլորտի համար: Այն կարևոր է երկու երկրների միջև համագործակցության, տնտեսական, միջմշակութային կապերի ամրապդնման գործում: Ինչ վերաբերում է զբոսաշրջությանը, ապա այս բնագավառում Հայաստան-Իրան համագործակցության օրակարգում հիմնական կարևոր հարցերից է երկու երկրների միջև զբոսաշրջային փոխայցելությունների քանակի ավելացումը: Եվ սա, իհարկե, ոչ միայն տնտեսական նշանակությունից ելնելով, կարևորվում է նաև զբոսաշրջության զարգացման միջոցով երկու բարեկամ երկրների միջև միջմշակութային կապերի ամրապնդումը»,-ասաց Մեխակ Ապրեսյանը:

Անդրադառնալով Հայաստան-Իրան զբոսաշրջային փոխայցերին' Մեխակ Ապրեսյանը նշեց, որ ավելի շատ Իրանից զբոսաշրջիկներ են գալիս Հայաստան, քան Հայաստանից' Իրան: 2015 թվականին 2014-ի համեմատ Իրանից եկած զբոսաշրջիկների այցելություններն ակտիվացել են: Գրանցվել է շուրջ 144 հազար այցելություն: Ընթացիկ տարվա առաջին եռամսյակի ընթացքում, 2015-ի առաջին եռամսյակի համեմատ, 40 տոկոսով ավելացել է Իրանից Հայաստան այցելությունների թիվը: Իրանից զբոսաշրջային այցելությունների 70 տոկոսը ընտանիքներով են: Մեծ մասը գալիս է անհատական նախաձեռնությամբ:

Հայաստան այցելած իրանցիները նախընտրում են և’ Երևանը, և’ Հայաստանի մարզերը, նրանք այցելում են զբոսաշրջային գրավչության վայրեր' կապված իրենց այցի տևողությունից: Մեխակ Ապրեսյանի խոսքով, պետք է անել ամեն ինչ, փոխայցելություններն ակտիվացնելու համար: Դա ենթադրում է, որ աշխատանք է տարվելու երկու երկրների զբոսաշրջային ընկերությունների հետ, նրանց միջև գործարար կապերի հաստատման ուղղությամբ:

Ի դեպ, Իրանի հետ համագործակցության օրակարգում է նաև Իրան-Հայաստան տարածաշրջանային զբոսաշրջային արդյունքի ձևավորման հարցը: Այսինքն' այլ երկրների զբոսաշրջիկներին կներկայացվի տուրիստական փաթեթ մեկ այցելությամբ Հայաստանում ու Իրանում լինելու համար: