Հարցը փակված է…

Հայաստանում վաղուց արմատացած կոռուպցիայի ու ամենաթողության դեմ սկիզբ առած պայքարը շարունակում է մնալ ամենաշատը քննարկվող թեմաներից մեկը:

Գրեթե չկա մի օր, որ սրա մասին չխոսվի, չգրվի, ու թեման չքննարկվի: Հարցն այնքան հրատապ է դարձել մեզանում, որ քաղաքական գործիչներին ու պատգամավորներին' լրագրողների կողմից տրվող հարցափնջերում կոռուպցիայի դեմ պայքարի, այս կամ այն քաղաքական գործչի ունեցած տեսլականին վերաբերող հարցերը երրորդ պլան են մղել մյուս պրոբլեմներին վերաբերող հարցադրումներն ու վերածվել ոմանց մտքի թռիչքը ստուգելու անկրկնելի միջոցի, որ օգնում է հասկանալ' մի քանի շաբաթվա պատմություն ունեցող կոռուպցիայի դեմ պայքարը իրակա՞ն է, թե՞, այնուամենայնիվ, աննյութական:

Օրերս ԱԺ-ում տեղի ունեցած ճեպազրույցի ժամանակ կոռուպիցայի դեմ պայքարի մասին իրեն ուղղված հարցին ԱԺ ՀՀԿ խմբակցության ղեկավար Վահրամ Բաղդասարյանը մի շատ հետաքրքրական պատասխան էր տվել' ասելով, թե այն միանգամից արմատախիլ անելը կարող է վտանգավոր լինել ու, որ այդ չարիքի դեմ պայքարն իրականում շարունակական գործընթաց է: Այն, որ կոռուպցիայի դեմ պայքարը շարունակական գործընթաց է, անվիճելի է. չես կարող այս երևույթի դեմ պայքարը սահմանափակել, ասենք, 6 ամսով, իսկ նշված ժամանակահատվածը լրանալուն պես սկսես խրախուսել կաշառակերությունը: Բայց ի՞նչ է ասել' «միանգամից արմատախիլ անելը կարող է վտանգավոր լինել», որտե՞ղ է Բաղդասարյանը տեսնում դրա վտանգը, շատ հետաքրքրական է:

Այն, որ այս գործիչը հասարակությանն ավելի շատ հայտնի է իր' երբեմն աբսուրդի հասնող մտքերով, ամենևին էլ նորություն չէ: Թե ինչով է դա պայմանավորված, կարծում ենք պարզ է անգամ ծծկերին, ու շատ խելք պետք չէ հասկանալու համար, որ նրա բոլոր գործողություններն ուղղված են միայն մի բանի' հաճելի թվալ վերևներին: Իսկ այն, որ կոռուպցիայի դեմ վճռական պայքարը վնասելու է նախևառաջ հենց վերնախավում հանգրվվանածների բիզնես-շահերին ու զրկելու է նրանց արտոնյալ կարգավիճակից, իշխանությունում հասկանում են բոլորը, այդ թվում և Բաղդասարյանը:

Շեշտելով ժանտի դեմ վճռական պայքարի վտանգավորության կեղծ թեզը' Բաղդասարյանը, ըստ էության, փորձում է հանրությանը համոզել, թե իբր երկրում այսչափ արմատացած կոռուպցիան բխում է հենց երկրի շահերից, իսկ ցանկացած մեկը, ով կհանդգնի արմատական քայլերի դիմել ու մեկընդմիշտ արմատախիլ անել այն մեր իրականությունից, կարող է ակամա վնաս հասցնել պետությանն ու հասարակությանը. պնդում, որը, մեղմ ասած, զուրկ է որևիցե հիմնավորումից: Մարդկության փորձն ապացուցում է, որ առանց վճռական կտրուկ գործողությունների, կոռուպցիան երբեք չի կարող իր տեղը զիջել օրինականությանը, իսկ բոլոր այն պնդումները, թե դրա դեմ պայքարը կարող է ուղեկցվել երկրում ներքին ցնցումներով, նույնքան մերկապարանոց են, որքան լկտի սուտը:

Փաստորեն' Բաղդասարյանի հնչեցրած մտքերից պարզ է դառնում, որ բոլորիս հույսերը' կապված երկրի պետական կառավարման ապարատը հիմնովին մաքրագործելու հետ, անհիմն ու սին են. կառավարությունում ավելի շատ հակված են կոռուպցիայի դեմ պայքարը սահմանափակել մեքենաներ կրճատելու տխրահռչակ միջոցառումներով, որոնք ավելի շուտ նման են PR ակցիայի, քան իրական պայքար ծավալելու: Համաձայնե՛ք, սակայն, որ այս ամենում ոչ մի անակնկալ լինել չէր կարող, քանի որ բոլորս էլ ի սկզբանե շատ լավ գիտակցում էինք, որ մեր երկրում պայքարն այս ոչ մի ապագա էլ չունի. հիմնական կոռուպցիոներները հենց նրանք են, ովքեր ամենաշատն են խոսում ժանտի դեմ պայքարի մասին:

Դավիթ ԲԱԲԱՆՈՎ