Ամեն ինչ անելու ենք հաղթելու համար. Սարգիս Հովսեփյան

«Ցանկանում եմ, որ հաղթենք, պարզ է, որ դժվար է լինելու: Դրա համար ամեն ինչ անում ենք: Վստահաբար ասել, թե հաղթելու ենք, ոչ մի մարզիչ չի կարող, որովհետև անհնար է գուշակել` ինչ կլինի խաղին: Ցանկացած բան կարող է լինել խաղադաշտում: Ֆուտբոլը հենց դրանով է հետաքրքիր: Բայց մենք ամեն ինչ անելու ենք հաղթելու համար: Կարող է որակը մի փոքր քիչ լինել, քանի որ կան երիտասարդ ֆուտբոլիստներ, բայց նվիրումը մեծ է լինելու, և դա մենք անպայման կցուցադրենք վաղվա խաղին»,- ԼՈւՐԵՐ.com-ի թղթակցի փոխանցմամբ՝ այս մասին լրագրողների հետ զրույցում, Եվրոպայի լիգայի որակավորման փուլի առաջին տուրի «Փյունիկ»-«Եվրոպա» պատասխան խաղից առաջ, ասաց «Փյունիկի» գլխավոր մարզիչ Սարգիս Հովսեփյանը:

Խոսելով թիմերի միջև առաջին խաղի մասին` մարզիչն ասաց.

«Մինչև 25-րդ րոպեն խաղը նորմալ էր ընթանում: Հակառակորդը ոչ մի պահ չէր կարողանում ստեղծել` լավ պաշտպանվում էինք: Բայց կոպիտ սխալ թույլ տվեցինք պաշտպանությունում: Պատանի ֆուտբոլիստներ կային, իրենց կոպիտ սխալը հասկանում եմ: Բայց անհասկանալի էր հավաքականի ֆուտբոլիստի սխալը: Թիմն էլ այդպիսի փորձառու թիմ չէր, որ կարողանար 2:0 հաշվից հետո խաղը փոխել իր օգտին: Այդ հաշվից հետո պարզ էր, որ մրցակիցն ուշադրություն պետք է դարձներ պաշտպանությանը: Դրանից ելնելով` շատ դժվար էր մեզ համար: Կային ֆուտբոլիստներ, ովքեր բացակայում էին, նրանց փոխարեն խաղում էին երիտասարդներ, ովքեր այդպիսի փորձ չունեին: Հակառակորդը փորձառու թիմ էր: Չպետք է այդ հաշվով պարտվեինք: Բաց արդեն պարտվել ենք, սա է իրավիճակը»:

Անդրադառնալով երկրպագուների դժգոհություններին` Հովսեփյանը հավելեց.

«Նորմալ է, որ նրանք դժգոհ են: Ինչպես կարող է դժգոհություն չլինել: Նորմալ եմ ընդունում, որովհետև ցանկացած պարտության դեպքում քննադատություն պետք է լինի: Բայց մենք աշխատում ենք: Առջևում կա դեռ մեկ հանդիպում, որտեղ մենք կարող ենք ամեն ինչ ուղղել:

Խոսելով մրցակցի և վաղվա խաղի ակնկալիքների մասին` մարզիչն ասաց.

«Միայն հաղթանակ եմ ակնկալում: Հակառակորդն ավելի շատ ուժեր է կենտրոնացնելու պաշտպանությունում, որովհետև 2:0 հաշվի դեպքում անիմաստ է առաջ շարժվելը և բացել ազատ գոտիներ, որ մերոնք կարողանան պահեր ստեղծել: Նրանք ավելի շատ պաշտպանվելու են, մենք ավելի շատ` հարձակվելու: Պարզ է` իրենց հակագրոhները շատ վտանգավոր կլինեն: Մեր թիմն անընդմեջ գրոհի պետք է դիմի: Հրահանգել եմ, որ եզրային պաշտպաններն էլ անպայման գրոհեն և ավելի շատ մտածեն հարձակման մասին, որովհետև 2:0 հաշվի դեպքում մենք կորցնելու բան չունենք: Մրցակիցը շատ ուժեղ չէր, բայց փորձառու էր: Իսպանիայի տարբեր լիգաներում խաղացած տղաներ ունեն: Իհարկե, սա ոչ մի կերպ չի արդարացնում մեր պարտությունը: «Փյունիկը» երիտասարդ ֆուտբոլիստներ ունի, և ժամանակ է անհրաժեշտ, որ նրանք ինչ-որ մակարդակի հասնեն:

Մեզ համար դժվար էլ լինելու, որովհետև 2:0 հաշիվն ուժ և վստահություն է տալիս մրցակցին: Բայց եթե մենք արագ գոլ խփեցինք, իհարկե, նրանց նյարդերը հնարավոր է` տեղի տան: Շատ եմ կարևորում, որ արագ գոլ խփենք: Դրանից ելնելով` պարզ կլինի, թե ինչպես կընթանա խաղը: Ավելի շատ ուշադրությունը դարձնելու ենք հարձակմանը, ոչ թե պաշտպանությանը: Հասկանում ենք` պաշտպանությունն էլ պետք է ուշադրության տակ պահենք, որ նորից չպարտվենք: Կարևորը հաղթելն է, և առաջին փուլը հաղթահարելը»: