Սոցփաթեթից հանգստի բաղադրիչը կասեցրել են, որպեսզի հողմաղացների դեմ անարդյունավետ չպայքարեն

Ֆինանսների նախարարի առաջարկով 2017-2019 թթ. սոցփաթեթում հանգստի բաղադրիչը կկասեցվի և կթողնվի միայն առողջապահության բաղադրիչի ֆինանսավորումը: Պատճառը՝ չարաշահումներն են, որոնց դեմ պետությունը չի կարողանում պայքարել։

ԼՈւՐԵՐ.com-ի տեղեկացմամբ՝  Քաղաքացիական ծառայության ղեկավար Մանվել Բադալյանը պատասխանելով լրագրողներից մեկի այն հարցին, թե ինչու պետք է քաղաքացին զրկվի հանգստի իր իրավունքից, միայն այն պատճառով, որ չարաշահումներ են տեղի ունենում և պետությունը չի կարողանում պայքարել դրանց դեմ, ասաց. «ընթացակարգերում երևի բացեր կան, որոնք ժամանակի ընթացքում ի հայտ են եկել, այդ բացերը շտկելու համար ժամանակ է հարկավոր։ Այդ հարցը ինչպես ինձ, այնպես էլ բոլորին պետք է մտահոգի, որքանով ես եմ տեղյակ քաղծառայողները հանգստյան տների հետ կեղծ պայմանավորվածություններ են ձեռք բերում, ձևակերպումներ անում, իրականում չհանգստանալով, բայց ֆինանսական փոխանցումներ կատարում»։

Նրա խոսքով՝ դա բավականին մեծ ծավալներ ունի և մասնավոր դեպքերի հիման վրա չի կայացվել այդ որոշումը. «Այս որոշմամբ փորձել են պետական միջոցների վատնումից խուսափել»,- ասաց Բադալյանը։

Կարծում է՝ պետք է կարճաժամկետ լինի և խնդիրը շուտ պետք է լուծվի, որպեսզի բարեխիղճ քաղաքացիները չտուժեն։

Հարցին, թե կարող է սա պետբյուջեն գումարով լցնելու համար է արվում, Բադալյանը հերքեց, ասելով, որ այսպես թե այնպես, այդ գումարներոը բյուջեով հատկացված են։

«Որպեսզի հողմաղացների դեմ անարդյունավետ չպայքարենք, դրա համար կասեցնում ենք, ճիշտ չէ այսօր իրավապահ մարմինների կողմից գործողություններ իրականացնելը և նախընտրելի է ընդամենը կասեցնել, մինչև խնդրի լուծումը»,- ասաց Բադալյանը։