Առաջադրանք էր դրված իմ առաջ, բայց չեմ կատարել, գտնում եմ` պետք է հրաժարական տամ. Սարգիս Հովսեփյան

«Իմ առջև առաջադրանք էր դրված, և ես այդ առաջադրաքը չեմ կատարել, հետևաբար գտնում եմ, որ պետք է անպայման հրաժարական տամ: Չկարողացա նպատակին հասնել և պետք է մի մարդ գա, ով ավելի լավ կկարողանա աշխատել «Փյունիկի» հետ: Այս պահին ես այսքանը կարողացա անել: Իմ հարազատ ակումբն է, հաջողություն եմ ցանկանում թիմին»: ԼՈւՐԵՐ.com-ի թղթակցի փոխանցմամբ՝ այս մասին լրագրողների հետ զրույցում, Եվրոպայի լիգայի որակավորման փուլի առաջին տուրի «Փյունիկ»-«Եվրոպա» պատասխան խաղից հետո, ասաց «Փյունիկի» գլխավոր մարզիչ Սարգիս Հովսեփյանը:

Խաղի մասին խոսելիս մարզիչը հավելեց.

«Նվիրվածություն կար, բայց պարզ էր՝ որակը պակասում էր: Ոչինչ չունեմ ասելու: Ճակատագրական եղավ գոլ բաց թողնելը, որից հետո մեր հնարավորությունը նվազեց... Այսօր այսքանը կարողացան մեր երիտասարդները»:

Հիշեցնենք, որ Հովսեփյանի թիմը տնային խաղում հաղթեց 2:1 հաշվով: Քանի որ առաջին խաղում «Եվրոպան» հաղթել էր 2:0 հաշվով, երկու խաղերի արդյունքում գրանցված ընդանուր 3:2 հաշիվը հյուրերին ապահովեց հաջորդ փուլի ուղեգիր: