Հայաստանում նոր համաճարակ կա` գրեթե ամեն գնով Եվրոպա ընկնելու

Այս տպավորությունը կարելի է ստանալ ծանոթանալով միմյանց արագորեն հաջորդող քրեական գործերին ու լսելով դրանցից էլ բազմաթիվ պատմությունները եվրոպական երկրներ մուտքի արտոնագրերի չստացվելու, վիզայի դասավորման ձախողված գործերի մասին: Մինչդեռ ժամանակն է կանգ առնելու, սթափ մտածելու…

Այո, եվրոպական այն երկրները, որտեղ գրեթե ամեն կերպ ձգտում են հասնել մեր հայրենակիցները, Հայաստանից հարուստ են, կյանքն այնտեղ բարեկեցիկ է, եթե լուրջ աշխատանք ունես և օրինական կեցության կարգավիճակ: Իսկ եթե չունես բավարար վարձատրվող աշխատանք կամ աշխատանք ընդհանրապես, նպաստի հույսին ես, ապա, ճիշտ է, Հայաստանի ընչազուրկներից ու նույնիսկ աշխատանք ունեցողների մի մասից նյութական առումով թեև լավ կապրես, բայց առանց քո տունն ունենալու, անորոշ ապագա ունեցող ժամանակավոր կենվորի կարգավիճակով և սահմանափակ իրավունքներով, որին ցանկացած պահի այդ երկրի իշխանությունները կարող են արտաքսել:
Ավելին. խնդիրը միայն բարեկեցությունը, լավ սնվել, հագնվելը չէ. այսօրվա Եվրոպան նախկին անվտանգ Եվրոպան չէ, այնտեղ ապրելը ահաբեկչության գնալով ծավալվող ալիքի հետ դառնում է վտանգավոր, շատ եվրոպացիներ իրենց օրը տագնապով են սկսում ու տագնապով ավարտում: Էլ չենք խոսում Եվրոպայում գնալով ծավալվող այլասերվածության, եվրոպական զարգացած երկրների հրապարակներում ու պողոտաներում միմյանց հաջորդոդ գեյերի ու լեսբուհիների շքերթների, այլասերվածների այլ հրապարակային միջոցառումների մասին, որոնք եթե այնտեղ ապրելու գնացած մեր հայրենակիցների երեխաները տեսնեն ու հարցեր տան իրենց ծնողներին, չգիտենք, թե վերջիններս ինչ են պատասխանելու: Ի վերջո, նրանք, ովքեր լքում են Հայաստանը, գնալուց առաջ թող մի հարց տան' ո՞ւմ են թողնում իրենց հայրենիքը, ծնողների կամ տատերի, պապերի գերեզմանները:

Ըստ քրեական գործերի նյութերի, ոմանք Եվրոպա ընկնելու համար փորձել են նույնիսկ կեղծ փաստաթղթեր ձեռք բերել, ոմանք էլ կեղծ փաստաթղթեր են օգտագործել… Մեղադրական եզրակացության համաձայն, Արմեն Մանուչարյանը նախաքննությամբ չպարզված անձից և հանգամանքներում ձեռք է բերել գնդիկավոր գրելագործիքով և համակարգչային գունավոր շիթային տպիչով պատրաստված կեղծ փաստաթղթեր հանդիսացող բնութագիր, «էպիկրիզ», «մարտական ուղի» կոչված փաստաթղթեր, Վասիլի Օլեգի Ասլանիդիսի կենսագրական տվյալներով լրացված ՀՀ երկրապահ կամավորական միության վկայական և այլ փաստաթղթեր, որոնք կոնկրետ գործի լուծման, այն է՝ եվրոպական որևէ երկրում որպես փախստական հանձնվելու համար, 4000 եվրո գումարի դիմաց 2014թ. հոկտեմբերի 28-ին Նոր Նորքի 2-րդ զանգվածում գտնվող Վոյաժ սրճարանում փորձել է իրացնել Արտակ Հարությունյանին, սակայն հանցագործությունն իր կամքից անկախ հանգամանքներում ավարտին չի հասցրել, քանի որ բռնվել է ՀՀ ԱԱԾ աշխատակիցների կողմից:

Մեկ ուրիշը' Կարեն Ալոյանը, ըստ մեղադրական եզրակացության, Գերմանիայից արտաքսվելուց հետո այնտեղ վերադառնալու նկատառումից ելնելով, կեղծ տվյալներով, կեղծ փաստաթղթով 2015թ. հոկտեմբերի 24-ին հատել է ՀՀ պետական սահմանը և մուտք գործել Հայաստանի տարածք: Բացի այդ, համաձայն քր. գործի նյութերի, մաքսանենգությամբ ՀՀ սահմանով իր հետ փոխադրել է «Բուպրենորֆին» տեսակի թմրամիջոց: Ո՞վ իմանա, միգուցե մտածել է, թե դրանով ճանապարհի ծախսը կհանի՞: