«Յունայթեդի» նոր «հիթը». MkHITaryan

«Մանչեսթեր Յունայթեդը» ձեռք է բերել մեր «Յուրահատուկին»:

Հայաստանի ազգային հավաքականի ավագ Հենրիխ Մխիթարյանը հայկական ֆուտբոլում նոր պատմության սկիզբ դրեց: Մարդ, ով այլևս դասվեց այն հայերի շարքում, ում շնորհիվ կրկին ու կրկին հիշատակվելու է Հայաստանը:

Օրեր շարունակ տաղանդավոր այս խաղացողը գտնվում էր միջազգային առաջատար լրատվամիջոցների ուշադրության կենտրոնում: Մինչև որ «կարմիր սատանաների» պաշտոնական կայքը գրեց. «UNITED SIGN HENRIKH MKHITARYAN»:

Հայտարարությունից հետո Հայաստանի հավաքականի կիսապաշտպանի մասին հոդվածները նոր շնչառությամբ ներկայացվեցին առաջատար լրատվամիջոցներում` Bild, Mirror, Daily Mail... Ամենուր խոսվեց Մխիթարյանի հայ լինելու ու Հայաստանը ներկայացնելու մասին:

Իսկ հայ ֆուտբոլասերի համար այդքան հեռու թվացող մանչեսթերյան ակումբն այսուհետ դարձավ «մերը»: 

Հենոյի բարձր խաղամակարդակի մասին բազմիցս նշել են նաև մարզիչները. 

«Նա միանշանակ աշխարհի ամենատաղանդավոր խաղացողներից մեկն է: Արագության և տեխնիկայի համատեղումը ֆանտաստիկ է: Դա ոչ բոլոր ֆուտբոլիստները ունեն»,-նման կերպ է արտահայտվել Մխիթարյանի մասին Յուրգեն Կլոպը:

Հարցազրույցներից մեկի ժամանակ Դորտմունդի «Բորուսիայի» մարզիչ Թոմաս Տուխելը նշել էր, որ Մխիթարյանի պես ֆուտբոլիստ ունենալը մեծ առավելություն է.

«Նման ֆուտբոլիստի մասին կարելի է միայն երազել: Մեծ առավելություն է նրա մարզիչը լինելը: Մխիթարյանը լավագույն ֆուտբոլիստներից մեկն է և նա դեռ չի բացահայտել իր ողջ ներուժը»շ:

Իսկ օրերս ֆուտբոլային աշխարհի «Յուրահատուկը» անձամբ խոստովանեց Մխիթարյանի վարպետությունը.

«Հենրիխը շատ տաղանդավոր ֆուտբոլիստ է: Նա իսկական թիմային խաղացող է' մեծ վարպետությամբ: Ուրախ եմ, որ նա ընտրեց «Յունայթեդը»:

Եվ չնայած տաղանդին ու ունեցած լուրջ հաջողությանը, մեր հավաքականի, չեմ խուսափում ասել` լեգենդը, «Մանչեսթեր Յունայթեդում» առաջին իսկ հարցազրույցում չմոռացավ խոսել իր հայրենիքի մասին.

«Հայրենիքումս սպասում էին այս տեղափոխությանը: Ուրախ եմ, որ հպարտ են ինձանով»:

«Արցախը տասնամյակներ շարունակ շատ է տուժել: Ինձ հաճելի է օգնել այն մարդկանց, ովքեր պատերազմի ընթացքում հարազատներ են կորցրել»,- այս մասին Մխիթարյանն ասել էր իսպանական հեղինակավոր Marca պարբերականի հետ զրույցում:

Եվ հենց աշխատասիրության ու համեստության շնորհիվ Մխիթարյանի հաջողությունը հայրենիքում համարժեք արձագանքը ստացավ` սա բոլորի հաջողությունն էր: Օրեր շարունակ Հայաստանում ամենաքննարկվող Մխիթարյանի ձեռքբերմամբ ուրախացան և դրական մեկնաբանություն տվեցին գրեթե բոլոր: Անտարբեր չմնացին նույնիսկ նրանք, ովքեր անտարբեր են ֆուտբոլի նկատմամբ:

Մխիթարյանի տեղափոխությունը ամենատարբեր որակումը ստացավ` ««Յունայթեդի» աղմկալի ձեռքբերումից մինչև «Յունայթեդի» նոր հիթը» (MkHITaryan): 

27-ամյա ֆուտբոլիստը աշխատասիրությամբ օրինակ կարող է ծառայել բազմաթիվ երիտասարդների համար, ովքեր իրենց կարիերայի «լուսաբացում են»` ինչպես ֆուտբոլում, այնպես էլ դրա սահմաններից դուրս:

Հենոն և իր մտքերը.

«Ինձ աստղ չեմ համարում: Ես Երևանի հասարակ բնակիչ եմ: Աստղերը երկնքում են» (2012թ.):

«Ցանկանում եմ` խաղաղություն լինի ամբողջ աշխարհում: Բոլոր մարդիկ արժանի են ապրելու լավագույն պայմաններում' առանց խնդիրների» (2016թ.):

«Ֆուտբոլ խաղում եմ շախմատի պես: Դուք պետք է շատ մտածեք և կանխատեսեք այն, թե ինչ կարող է պատահել ձեր արած քայլից հետո: Եթե սխալվեք, մրցակիցը կարող է պատժել ձեզ և դուք կպարտվեք խաղը» (2013թ.):

«Անձամբ ինձ համար հավաքականում մոտիվացիան` միայն հաղթանակն է: Երբ մենք հաղթում ենք,  բոլոր հայերի դեմքին ժպիտ է առաջանում, փողոցներում երաժշտություն է հնչում, մարդիկ տոնում են մեր հաղթանակը, որպես իրենց անձնական հաղթանակ: Հենց այդ ժպիտներն են ամենամեծ մոտիվացիան են ինձ համար»: (2015թ)

«Ինձ ոչ ոք մեկնարկային կազմում տեղ չի երաշխավորել: Դրա համար պետք է աշխատեմ ու աշխատեմ» (2015թ):

«Չեմ ցանկանում ինքնահավան թվալ, բայց կարծում եմ` կարող եմ ավելի լավ խաղալ» (2015թ):

«Միշտ ձգտում եմ սովորել: Դա իմ կյանքի հավատամքն է: Սովորել դադարող մարդը հավասարազոր է մահացածին» (2013թ.):

 Glory Glory Man United

 Լիանա Թորոսյան