Հարուստ պապաների պաշտոնավոր որդիները
Վերլուծական
ՀՀ ԶՈւ գլխավոր շտաբի պետ Յուրի Խաչատուրովի որդին` սկանդալային Գրիգորի Խաչատուրովը, նշանակվել է բանակային 3-րդ կորպուսի հրամանատար: Խաչատուրովը Հայաստանի քաղաքական կամ ռազմական էլիտայում միակը չէ, ով փորձում է առաջ քաշել որդուն` վերջինիս համար հաջող կարիերա ապահովելով:
Մամուլում վերջերս շատ են շրջանառվում լուրերը, որ ԱԺ-ի հատկապես օլիգարխ պատգամավորները, մտադիր են հաջորդ խորհրդարանում տեղ ապահովել իրենց զավակների համար: Եթե, օրինակ, արտաքին աշխարհի աչքում քաղաքակրթական ֆոն ապահովելու համար անհրաժեշտ է, որ հաջորդ խորհրդարանում չլինի լրագրողների հետ անընդհատ խնդիրներ ունեցող Մհեր Սեդրակյանը, ապա նա փորձում է պատգամավորական մանդատ ապահովել իր որդու համար: Ի վերջո, Սեդրակյանի որդին իր մտավոր, կազմակերպչական որակներով գուցե ամենևին չի զիջում ԱԺ նախագահ Գալուստ Սահակյանի որդիներին, ովքեր արդեն երկար ժամանակ ազդեցիկ ու եկամտաբեր պաշտոններ են զբաղեցնում:
Ի՞նչ է, իշխանավորների զավակները պաշտոններ զբաղեցնելու կամ բիզնես ունենալու իրավունք չունե՞ն: Շատերի այս հարցադրմանը միանգամից պատասխանեմ` ունեն: Համաշխարհային քաղաքականությունը ունի նման օրինակներ: ԱՄՆ նախագահ Ջորջ Բուշի որդին ավելի ուշ զբաղեցրեց հոր պաշտոնը, ընդ որում, դրանում ընտրվեց երկու անգամ: ԱՄՆ նախկին նախագահ Բիլ Քլինթոնի կինը` Հիլարին, ժամանակին եղել է պետքարտուղար, հիմա հավակնում է երկրի ղեկավարի պաշտոնին` համարվելով ընտրական գործընթացի ֆավորիտը: Սակայն, արևմուտքում այս ամենին խորթ աչքով չեն նայում, որովհետև ոչ թե ազդեցիկ հայրերն են նպաստել որդիների կամ ընտանիքի այլ անդամների առաջխաղացմանը, այլ` հասարակությունը ընտրական ինստիտուտների, ժողովրդավարական մեխանիզմների միջոցով:
Արևմուտքում շատ փողատերեր պաշտոնի չեն ձգտում, որպեսզի չվնասեն իրենց բիզնեսը: Հայաստանի տիպի երկրներում միանգամայն հակառակ պատկերն է, իշխանություն ունենալը համարվում է բիզնեսի զարգացման երաշխիք: Հայաստանում ընտրական ինստիտուտները կամ տնտեսական ազատ մրցակցությունը ոչինչ չեն որոշում: Որդիները պաշտոններ են ստանում, կամ բիզնեսի տեր են դառնում իրենց հայրերի, նրանց ազդեցության ու կապերի շնորհիվ:
Հայաստանը դարձել է հարուստ պապաների պաշտոնավոր որդիների երկիր: Դրա համար էլ մարդիկ հեռանում են երկրից` օտար ափերում ռեալիզացվելու, նորմալ աշխատանք ու արժանապատիվ կյանք ունենալու համար:
Սարգիս Հակոբյան
ՈՒՂԻՂ ԵԹԵՐ
Ամենադիտված 
Դիրքում բռնшբшրnւթյшն դեպքը տեսած, ապա սպшնված 3 զինվորների ծնողներն արդարադատություն են պահանջում (տեսանյութ)
