Բլեֆչիների Կառավարությունը

Էլեկտրաէներգիայի սակագնի նվազեցման թեման շաբաթներ շարունակ դարձել էր իշխանության PR-ի առանցքը: Բանից պարզվում է՝ օգոստոսի մեկից էլեկտրաէներգիայի սակագինը կարող է ոչ թե նվազել, այլ հակառակը՝ ավելանալ:

Մոտենում է օգոստոսի մեկը, սակայն Կառավարությունը էլեկտրաէներգիայի սակագնի մասամբ սուբսիդավորումը շարունակելու վերաբերյալ նոր որոշում չի կայացրել:

Իշխանության պաշտպանները կարող են հակադարձել, պնդել, որ մինչև օգոստոսի մեկը Կառավարությունը դեռ երեք նիստ է գումարելու և հարկ չկա հապշտապ հետևություններ անել:

Աստված տա նրանք ճիշտ լինեն և հոսանքի էժանացումը իրականություն դառնա, բլեֆի, էժանագին PR-ի փոխարեն, սակայն, այսօր գերադասում եմ խոսել կոնկրետ փաստերով, կոնկրետ իրականության մեջ:

Առայժմ չկա սուբսիդավորումը շարունակելու մասին Կառավարության նոր որոշում, ըստ այդմ, օգոստոսի մեկից ամսական մինչև 250կվ/ժամ էլեկտրաէներգիա սպառող ընտանքիները մեկ կիլովատ ժամի համար կվճարեն ոչ թե այսօրվա 41.85, այլ 46.2 դրամը:

Այսինքն՝ մեր բնակչության գերակշիռ մեծամասնության համար հոսանքը ոչ թե 2.58 դրամով էժանանալու է, ինչպես որոշել էր հանրային ծառայությունները կարգավորող հանձնաժողովը, այլ թանկանալու է 4.35 դրամով, որովհետև Կառավարությունը հավանաբար փող չունենալու ստանդարտ պատճառաբանությամբ սուբսիդավորումը շարունակելու վերաբերյալ որոշում չի կայացնի: Իր ձևավորման օրվանից Հովիկ Աբրահամյանի Կառավարությունը չի ունեցել երկարաժամկետ կամ կարճաժամկետ ծրագիր:

Մի կողմից Գործ ունենք Աբրահամյանի քաղաքական ամբիցիաների, Սերժ Սարգսյանի ժառանգորդը դառնալու ցանկության, մյուս կողմից կադրային մի համախմբի հետ, որին դժվար է Կառավարություն, միասնական թիմ  համարել, սրանով էլ պայմաանվորված է Կառավարության հրապարակային հայտարարությունների և գործողությունների կոնտրաստը:

Այս Կառավարությունն ամենապոպուրիստականն է՝ բողոքական  խմբերի պահանջներին արձագանքելու հարցում, բայց հետևողականորեն պաշտպանում է օլիգարխիայի շահերը:

Մինչև օգոստոսի մեկը Կառավարությունը երեք նիստ է անցկացնելու, դրանցից մեկում Հովիկ Աբրահամյանի կաբինետը կարող է էլեկտրաէներգիայի սակագնի մասամբ սուբսիդավորումը շարունակելու որոշում կայացնել, եթե դա տեղի չուենա, գործ ունենք բլեֆչիների կառավորության հետ, որը խոսքով հոսանքն էժանացնում է, իրականում՝ թանկացնում:

Սարգիս Հակոբյան