Սամվել Բալասանյանն ուզում է հաճույք ստանալ, բայց կույս մնալ

Տարիներ առաջ, որոշակի քաղաքական համաձայնությունների արդյունքում՝ ԲՀԿ անդամ Սամվել Բալասանյանը Գյումրիի քաղաքապետ դարձավ, գյումրեցիների մեծամասնության համար նա այնպես էլ չդարձավ յուրային,  ընկալվելով՝ որպես երևանից պարտադրված քաղաքապետ:

Երբ իշխանություն-ԲՀԿ հարաբերությունները սրվեցին՝ Բալասանյանը հայտնվեց անհարմար վիճակում՝ իր Անձի հանդեպ անվստահություն հարուցելով թե իշխանության ներսում, թե ԲՀԿ-ում:

Քաղաքական  հակադրություն այլևս չկա:

Բալասանյանը մերվել է իշխանություններին, և առնվազն Հովիկ Աբրահամյանի կողմից քաղաքապետի պաշտոնում մնալու «դաբրո» է ստացել:

Ամբողջ խնդիրն այն է, սակայն, որ փոխվել է Գյումրիի քաղաքային իշխանության ձևավորման ընտրակարգը:

Բացառապես համամասնական ընտրակարգով ընտրվելու է ավագանին, որն իր հերթին ընտրելու է քաղաքապետ: Բալասանյանը ԲՀԿ վերադառնալ չի կարող:

Իշխանությունները երկրորդ անգամ չեն հանդուրժի, որ Գյումրիի քաղաքապետ դառնա այլ կուսակցության ներկայացուցիչ:

Առհասարակ պարզ է, որ Բալասանյանը հոկտեմբերի 2-ից հետո կարող է մնալ քաղաքապետի պաշտոնում միայն մի դեպքում, եթե գլխավորի ՀՀԿ-ի կամ այդ կուսակցության տանիքի տակ գերիշխող համամասնական ցուցակը:

Այստեղ էլ առաջանում է մյուս խնդիրը: Բալասանյանի մամուլի քարտուղարն ասել է, թե իր ղեկավարը չի պատրաստվում նաև ՀՀԿ անդամ դառնալ:

Այստեղ են ասել՝ մարդն ուզում է և հաճույք ստանալ և կույս մնալ:

Անշուշտ Բալասանյանի իշխանական տանիքը կփորձի այնպես անել, որ Գյումրիի ընտրություններում ՀՀԿ-ն ներկայանա նոմենկլատուրային մի ցուցակով գործող քաղաքապետի գլխավորթությամբ: 

Ամբողջ խնդիրն այն է, որ քաղաքապետի անկուսակցական թեկնածուով ընտրությունների գնալն առնվազն պատվաբեր չէ ՀՀԿ-ի համար, հանրապետականները շարունակ խոսում են իրենց կադրային հարուստ բազայի մասին, բայց պարզվում է՝ Գյումրիի քաղաքապետի ընտրություններում չեն կարողանում գտնել մի արժանավոր հանրապետականի՝ հույսը դնելով Բալասանյանի վրա, նախկին «հավատավոր» ՕԵԿ-ականի, նախկին «հավատավոր ԲՀԿ-ականի»:

Եթե Գյումրիի ընտրություններում ՀՀԿ ցուցակը գլխավորի Բալասանյանը՝ Սերժ Սարգսյանի կուսակցությանը կարող են չհավատալ նաև հասարակությունը, գյումրեցիները:

Համամասնական ընտրություննեը առաջին հերթին նպաստում են քաղաքական պատասխանատվության ինստիտուտի արմատավորմանը:

Մարդիկ ձայն են տալու ոչ թե Բալասանյանին, այլ ՀՀԿ ծրագրին, որն է երաշխիքը, որ ամիսներ անց Բալասանյանը չի լքի ՀՀԿ-ն: ինչպես Ժամանակին լքել է ՕԵկը, ԲՀԿ-ն :

Լավ կլինի Բալասանյանը հաճույք ստանալու համար ընտրի Գյումրիի քաղաքապետարանի հեռու, անշառ մի տարածք, այդ դեպքում նա գուցե «կույս» մնա, խոսքը քաղաքական կուսության մասին է:

Սարգիս Հակոբյան