ՄԻԵԴ-ը պարտավորեցրել է ՀՀ-ին «Դոմազյանն՝ ընդդեմ Հայաստանի» գործով վճարել 3600 եվրո

Այսօր Կառավարության նիստում որոշում կայացվեց ՀՀ արդարադատության նախարարությանը 2016 թվականի ինն ամսում հատկացնել 3,600 (երեք հազար վեց հարյուր) եվրոյին համարժեք ՀՀ դրամ՝ «Դոմազյանն՝ ընդդեմ Հայաստանի» գործով կայացված վճռի կատարման համար:

1954թ․ ծնված Հայաստանի քաղաքացի Թամարա Դոմազյանը, ով ներկայումս բնակվում է Սանկտ Պետերբուրգում, հայց էր ներկայացրել Մարդու իրավունքների եվրոպական դատարան ընդդեմ Հայաստանի՝ բողոքելով, որ զրկվել է դատարան դիմելու իրավունքից, քանի որ Հայաստանը մերժել է նրա հակընդդեմ հայցը սեփականության իրավունքի վկայականի տրամադրման չեղարկման գործով:

Հենվելով Մարդու իրավունքների եվրոպական կոնվենցիայի 6-րդ հոդվածի առաջին կետի վրա (արդար դատաքննության իրավունք)՝ Թամարա Դոմազյանը բողոք էր ներկայացրել ՄԻԵԴ՝ նշելով, որ խախտվել է դատարանի հասանելիության իր իրավունքը՝ առաջին ատյանի դատարանի կողմից իր հակընդդեմ հայցի մերժման արդյունքում։

ՄԻԵԴ-ը գտել է, որ խախտվել է դիմումատուի իրավունքը։