Բա սա տղամարդու արա՞ծ է, այն էլ` հայ տղամարդու…

Այո, հենց այս հարցը պետք է տանք, եթե, իհարկե, պաշտոնապես առաջադրված մեղադրանքը հիմնավոր է: Տվյալ դեպքն, անշուշտ, բնութագրական չէ մեր հասարակության, ժողովրդի համար, սակայն քրեական լրահոսում առկա բազմաթիվ նման դեպքերի հետ միասին տագնապի ազդանշան է վերջին ավելի քան երկու տասնամյակում մեր հասարակության մեջ բարոյական անկման աճի մասին:
Քրեական գործի նախաքննությամբ պարզվել է, որ Ռոման Շամոյանը 2016թ. մարտին Վաղարշապատի հիվանդանոցում, ինչպես նաև հեռախոսազրույցների միջոցով անձնական մտերմական փոխհարաբերություններ է հաստատել Արմավիրի մարզի բնակչուհի Կ. Ջ-ի: Այնուհետև, ըստ մեղադրական եզրակացության, Ռ. Շամոյանը, Կ. Ջ-ի մասին արատավորող տեղեկություններ հրապարակելու' իր և այլ անձանց հետ սեռական հարաբերություններ ունեցած լինելու, նրա հետ մերկ լուսանկարները համացանցում տեղադրելու մասին տեղեկություններ հրապարակելու սպառնալիք ներկայացնելով, 2015թ. ապրիլից մինչև հոկտեմբեր ժամանակահատվածում պահանջել և տարբեր օրերի շորթման եղանակով նրանից մաս-մաս հափշտակել է 2 500 000 դրամ գումար և 276 000 դրամ ընդհանուր արժողության 9 կտոր ոսկյա զարդեր:

Բացի վերը նշվածից, Ռ. Շամոյանը, համաձայն քր. գործի նյութերի, Կ. Ջ-ին անզգուշությամբ ինքնասպանության կամ ինքնասպանության փորձի է հասցրել: Մասնավորապես' 2015թ. ապրիլից հոկտեմբեր ժամանակահատվածում սպառնալիքի և անձնական արժանապատվությունը պարբերաբար նվաստացնելու ճանապարհով, այն է' Կ. Ջ- ի նախկին անհաջող ամուսնության մասին հրապարակումներ կատարելու, նրա մերկ լուսանկարները համացանցում տեղադրելու, հարազատների շրջանում նրա անբարոյականության, ինչպես նաև իր և այլ անձանց հետ սեռական հարաբերություն ունենալու մասին տեղեկություններ տարածելու սպառնալիքի ազդեցությամբ Կ. Ջ-ին հասցրել ինքնասպանության փորձ կատարելու, ինչի արդյունքում վերջինս 2015թ. հոկտեմբերի 25-ին դուրս գալով իր տանից, գնացել է Երևան, որտեղ Հաղթանակ կամրջի վրայից նետվելու միջոցով փորձել է ինքնասպան լինել, սակայն այն կանխվել է քննությամբ չպարզված անձի կողմից:

Վերը նշված արարքների համար Ռոման Շամոյանին մեղադրանք է առաջադրվել ՀՀ ՀՀ քրեական օրենսգրքի 182-րդ հոդվածի («Շորթումը») 2-րդ մասի 3.1 կետի և 110-րդ հոդվածի («Ինքնասպանության հասցնելը») 1-ին մասի հատկանիշներով: