Էկոնոմիկայի նախարարության ձեռքից գնացած տեսչությունը, սպառողների ոտնահարված շահերն ու պաշտոնեական անփութությունը

ՀՀ էկոնոմիկայի նախարարության աշխատակազմի շուկայի վերահսկողության պետական տեսչությունը, որի գործունեությունը, ավելի ճիշտ, կոռուպցիայի կասկածների տեղիք տվող անգործությունը վաղուց է հարուցել սպառողների արդարացի դժգոհությանը, երկար ժամանակ է արդեն, չի գործում ընդհանրապես: Սպառողների շահերն այսօր փաստորեն ոտնահարված ու չպաշտպանված են մնում նաև կշեռքների ստուգաչափված չլինելու, հաճախ հանդիպող թերակշռումների, շուկայում անորակ և նույնիսկ վտանգավոր արդյունաբերական ապրանքների առկայության և իրացման առումով:

Առաջիկայում հիշյալ տեսչության հետ կապված հանգամանալից ուսումնասիրություն ու հրապարակում դեռ կունենանք, այժմ ուղղակի անդրադառնանաք մի քրեական գործի, որն ամենասերտ կերպով կապված է հիշյալ տեսչության մի բարձրաստիճան պաշտոնյայի հանցավոր անգործության կամ անփութության հետ:

Քրեական գործի նախաքննությամբ պարզվել է, որ Արծրուն Նաջարյանը հանդիսանալով ՀՀ էկոնոմիկայի նախարարության աշխատակազմի շուկայի վերահսկողության պետական տեսչության փաստաթղթաշրջանառության և իրավական համակարգման բաժնի պետ, քաղաքացիական ծառայողի անձնագրով ունեցել է վարչական տուգանքներ կիրառելու վերաբերյալ տեսչության պետի որոշումների նախապատրաստման, հաշվառման և գրանցման, կիրառված վարչական տուգանքների ամփոփման, հաշվետվությունների և տեղեկանքների կազմման աշխատանքների իրականացման պարտականություններ, ինչպես նաև իրեն անմիջականորեն ենթակա աշխատողների և բաժնի ընթացիկ գործունեությունը կազմակերպելու, ծրագրելու, համակարգելու, ղեկավարելու և վերահսկելու պատասխանատվություն:

Այնուհանդերձ, ըստ մեղադրական եզրակացության, Ա. Նաջարյանը 2010-2013թթ. ընթացքում դրսևորել է հանցավոր անփութություն, թերի և ոչ պատշաճ է կատարել քաղաքացիական ծառայողի պաշտոնի անձնագրով սահմանված իր պարտականությունները, ինչի հետևանքով պետական բյուջե չի վերականգնվել 8 320 000 դրամ, պետության օրինական շահերին պատճառվել է էական վնաս։

Վերը նշված արարքի համար Արծրուն Նաջարյանին մեղադրանք է առաջադրվել ՀՀ քրեական օրենսգրքի 315-րդ հոդվածի («Պաշտոնեական անփութությունը») 1-ին մասի հատկանիշով: Շահագրգի՞ռ է եղել նրա պաշտոնեական անփութությունը, թե հենց այնպես, այսինքն' առանց իմաստի, դատելով ամենից, չի պարզվել: