Սպանդ Ճապոնիայի հաշմանդամների տանը. զոհվել է 19 մարդ

Տոկիոյի արվարձանում հաշմանդամների տանը սպանդ սարքած ճապոնացին՝ 26-ամյա Սատոսի Ուեամցուն, 2012 թվականի դեկտեմբերից աշխատել է այդ հաստատությունում եւ այս տարվա փետրվարին ազատվել է անձնական պատճառներով: Այս մասին հաղորդել է ՏԱՍՍ-ը:

Ուեմացուն կալանավորված է սպանության փորձի եւ ապօրինի շենք ներթափանցելու պաշտոնական կասկածանքով: Քննիչների խոսքով՝ նա անբարյացակամ է վերաբերվել սահմանափակ հնարավորություներով մարդկանց եւ «նրանցից ազատվելու» ցանկություն է հայտնել:

Ինչպես Տոկիոյում կայացած մամուլի ասուլիսում է հայտարարել Ճապոնիայի նախարարների կաբինետի գլխավոր քարտուղար Յոսիհիդե Սուգան, իսլամիստական ծայրահեղականնների հետ Ուեմացուի հնարավոր կապի մասին ոչ մի տեղեկատվություն չկա:

Սագամիհարայի հիմնարկությունում հարձակումը, որտեղ ապրում էին սահմանափակ մտավոր հնարավորություններով մարդիկ, տեղի է ունեցել հուլիսի 25-ին մոտավորապես 02.30-ին (Երեւանի ժամանակով 21.30-ին): Այդ ժամանակ պանսիոնատում գտնվել են ութ աշխատակից, ինչպես նաեւ մեկ պահակ: Նաեւ այնտեղ կարող էին լինել 18-ից մինչեւ 75 տարեկան շուրջ 150 կենվորներ:

Նախնական տվյալներով՝ Ուեմացուն հիմնարկության մոտ է եկել սեւ ավտոմեքենայով եւ ներթափանցել բնակելի մասնաշենք՝ առաջին հարկում մուրճով ջարդելով լուսամուտը: Նա հետը բերել է դանակներով պայուսակ:

Իշխանությունները հավաստել են 18-ից մինչեւ 75 տարեկան 19 մարդու մահը: Եվս 20 տուժածների վիճակը գնահատվում է որպես ծանր: Վիրավորներին տեղափոխել են Տոկիոյի մի քանի հիվանդանոցներ, ոմանք գտնվում են անգիտակից վիճակում:

Հարձակումից մոտավորապես մեկ ժամ անց Ուեմացուն ներկայացել է ոստիկանական տեղամաս եւ խոստովանել, որ կոտորած է սարքել: