Ամերիկացիների գրեթե 60 տոկոսը կարծում է, որ Ռուսաստանն անբարյացակամ է ԱՄՆ-ի նկատմամբ

Ամերիկացիների գրեթե 60 տոկոսն այն կարծիքին է, որ Ռուսաստանն անբարյացակամ է ԱՄՆ-ի նկատմամբ կամ Միացյալ Նահանգների «թշնամին է»: Այդ մասին վկայում են այն հարցման տվյալները, որը CNN հեռուստաընկերությունն անցկացրել է ORC հետազոտական ծառայության հետ համատեղ:

Այսպես, հազարից ավելի հարցվածների միայն 8 տոկոսն է հայտարարել, որ Ռուսաստանը համարում է ԱՄՆ-ի դաշնակիցը, 31 տոկոսը Ռուսաստանը համարում է բարեկամ երկիր, 37 տոկոսը' ոչ բարեկամ, իսկ 31 տոկոսն ի դեմս Ռուսաստանի տեսնում է Միացյալ Նահանգների «թշնամուն»:

Այս թվերը տարբերվում են 2011 եւ 2014 թվականներին անցկացված հարցումների արդյունքներից: 2011 թվականին Ռուսաստանն ԱՄՆ-ի «թշնամի» էր համարում Միացյալ Նահանգների բնակիչների 9 տոկոսը, իսկ 16 տոկոսը նրան ընկալում էր որպես դաշնակից: 2014 թվականին այն կարծիքը, թե Ռուսաստանը ԱՄՆ-ի «թշնամին» է, պաշտպանում էր ամերիկացիների 25 տոկոսը, միայն 6 տոկոսն էր նրան դաշնակից համարում:

Մասնակիցներին նաև հարց էր տրվել, թե արդյոք նրանք այն կարծիքին են, որ Ռուսաստանը փորձում է ազդել ԱՄՆ-ի նախագահական ընտրությունների ելքի վրա: Գրեթե կեսը' հարցման մասնակիցների 48 տոկոսը, պատասխանել է' «այո», «ոչ» է պատասխանել հարցվածների 44 տոկոսը:

Հարցումը հուլիսի 29-31-ին անցկացվել է հեռախոսով, դրան մասնակցել է 1003 մարդ: Վիճակագրական անճշտությունը կազմում է 3 տոկոս, հաղորդել է ՏԱՍՍ-ը: