Հանրահավաքն ավարտվեց Ազատության հրապարակում (ուղիղ միացում)

23:00

«Ազատության» հրապարակում ավարտվեց ի պաշտպանություն ՊՊԾ գունդը գրաված «Սասնա ծռեր» խմբի կազմակերպված երթը։ Ցուցարաները պայմանավորվեցին վաղը ժամը 19:00-ին կրկին հավաքվել նույն վայրում: 

22:17

Այս պահի դրությամբ երթի մասնակիցներն ԱԱԾ շենքի մոտ են: Նրանք առանձին-առանձին վանկարկում են «Սասնա ծռերի» անդամների անունները:

21:28

Ազատության հրապարակում ի աջակցություն «Սասնա ծռերի» հանրահավաքի մասնակիցները երթ են անում կենտրոնի փողոցներով։

Հավաքվածները որոշեցին քայլերթ անցկացնել. Թումանյան, Աբովյան փողոցներով, Հանրապետության հրապարակով դեպի ԱԱԾ շենք:

21:00

Հանրահավաքի ընթացքում ելույթ ունեցողներն իրենց դիտարկումներն ու պահանջներն ներկայացրին երևանյան վերջին իրադարձությունների առնչությամբ:

Ելույթ ունեցողները կարևորեցին հասարակության հետագա ակտիվության պահպանումը և համակարգված գործունեությունը:

Հավաքվածները պահանջեցին ազատ արձակել «Հիմնադիր խորհրդարանի» անդամ Ալեք Ենիգոմշյանին, ինչպես նաև զանգվածային անկարգություններ կազմակերպելու կասկածանքով կալանավորված Արմեն Մարտիրոսյանին, Անդրեաս Ղուկասյանին, Դավիթ Սանասարյանին, Հովսեփ Խուրշուդյանին, իսկ ՊՊԾ գունդը գրաված զինյալներից Պավել Մանուկյանին և նրա որդուն՝ Արամ Մանուկյանին տեղափոխել Էրեբունի հիվանդանոց:

20:51

Հանրահավաքը մեկնարկեց.

Այն վարում է «Հիմնադիր խորհրդարանի» անդամ Հարություն Աղլամազյանը։ Վերջինս հույս հայտնեց, որ «Սասնա ծռեր» խմբի տղաները մոտ ապագայում ազատության մեջ կլինեն եւ կմիանան պայքարողներին։

Նա նաեւ նշեց, որ հանրահավաքն ինքնաբուխ է, յուրաքանչյուրը կարող է մոտենալ բարձրախոսին եւ ելույթ ունենալ։

«Առաքելություն» կուսակցության ներկայացուցիչ Մանուկ Սուքիասյանն ներկայացրեց Դավիթ Սանասարյան, Արմեն Մարտիրոսյանի, Անդրիաս Ղուկասյանի նկատմամբ կալանքի որոշում կայացնելու մանրամասները։

74-ամյա նարեկագետ Աշոտ Պետրոսյանը անժամկետ հացադուլ հայտարարեց՝ պահանջելով ազատ արձակել Ժիրայր Սեֆիլյանին, Ալեք Ենիգոմշյանին։

Այսօր ժամը 19:00-ին հայտարարված էր հանրահավաք Ազատության հրապարակում.

Հիշեցնենք, որ Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց՝ պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին: ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Պատանդ վերցվածներն ազատ են արձակվել մեկ շաբաթվա ընթացքում, սակայն հուլիսի 27-ին նրանք կրկին պատանդ են վերցրել բուժօգնության հասած բուժաշխատողներին:

Հուլիսի 30-ին գնդի տարածքից դիպուկահարի կրակոցից զոհվել է ոստիկանության զորքերի ծառայող Յուրի Տեփանոսյանը:

Հուլիսի 31-ին զինված խմբի անդամները վայր են դրել զենքն ու հանձնվել: