Երկիրն է դատարկվում, երկիրը. այդ մասին է վկայում նաև սուրճի ու թեյի ներմուծման ցուցանիշների կրճատումը

ՀՀ ազգային վիճակագրական ծառայության վճարային հաշվեկշռի և արտաքին առևտրի վիճակագրության բաժնի տեղեկացմամբ, 2016թ. հունվար-մայիսին Հայաստան է ներմուծվել 4235 տոննա սուրճ, որը նախորդ տարվա նույն ժամանակահատվածի համեմատ պակաս է 499 տոննայով: 2015թ. հունվար-մայիսին Հայաստան է ներմուծվել 4734 տոննա սուրճ:

Բացի ՀՀ ներկրվող սուրճից, հիշյալ բաժնի տեղեկացմամբ, նվազել է նաև Հայաստան ներկրվող թեյի ծավալը: Այս տարվա հունվար-մայիսին ներկրվել է ընդամենը 140 տոննա թեյ, ինչը 2015թ. նույն ժամանակահատվածի համեմատ նվազել է 12 տոննայով:
Ընդգծենք, որ ՀՀ սուրճի և թեյի ներմուծման ծավալների նվազումը պայմանավորված է դրանց սպառման ծավալների նվազմամբ: Սակայն, սպառման ծավալները նվազել են ոչ թե այն բանի պատճառով, որ սուրճ և թեյ օգտագործող ՀՀ բնակիչներից յուրաքանչյուրն այս տարվա հունվար-մայիսին դրանք ինչ-որ «հրաշքով» չի օգտագործել նախորդ տարվա նույն ժամանակահատվածում սպառածի չափ, այլ բոլորովին այլ և աղետալի իրողությամբ՝ շարունակվող արտագաղթով, երկրում փաստացի ապրող բնակչության թվաքանակի կրճատմամբ: Արտագաղթն արդեն իսկ վերածվել է մեր ազգային անվտանգության հանդեպ լրջագույն սպառնալիքի: