Հուլիսի 17-ի միջադեպը կանխորոշեց 2017-ի ընտրությունների ելքը

2015 թ. Սահմանադրական հանրաքվեից հետո շատերը կանխորոշված են համարում իշխանության վերարտադրության հարցը: Հասարակության մեծ մասը դժգոհ է նման հեռանկարից, սակայն տարբեր կերպ է արտահայտում իր անհամաձայնությունը:

Շատերն արտագաղթում են, չնայած իրենց գրավչությունը կորցրել են անգամ կայուն ճգնաժամի մեջ հայտնված Ռուսաստանն ու ահաբեկչությունների թիրախ դարձած Եվրոպան:

Հասարակության մի զգալի հատվածը վաղուց կորցրել է հավատը փոփոխությունների հնարավորությունների հանդեպ և այլևս չի վստահում ոչ միայն իշխանություններին, այլ նաև ընդդիմությանը:

Այս մարդիկ գոնե հիմա քաղաքական ակտիվություն ցուցաբերելու մոտիվացիա չունեն և զբաղված են իրենց ընտանիքի առօրյա հացը վաստակելու խնդիրներով:

Եվ վերջապես, կա բողոքավորների մի զանգված, որը մշտապես կոչ էր անում իշխանությունների հետ խոսել իրենց լեզվով, այսինքն՝ ուժի դիրքերից:

Հուլիսի 17-ի միջադեպի ձախողումից հետո էապես թուլացել է քաղաքական ակտիվություն ցուցաբերելու այս խմբի մոտիվացիան ևս:

«Սասնա ծռերի» զինված ապստամբության փորձի ձախողումը հասարակության շրջանում խթանելու է անկումային տրամադրությունները 2017-ի խորհրդարանական ընտրություններում՝ հեշտացնելով իշխանության գործը:

Մարդիկ վաղուց չէին հավատում ընտրություններին ու հանրահավաքներին, հիմա չեն հավատում նաև ուժով իշխանություն փոխելու հնարավորությանը:

Հուլիսի 17-ի միջադեպը բացահայտեց հասարակության անվստահությունը ոչ միայն իշխանության, այլ նաև ընդդիմության հանդեպ:

«Տիտղոսային» ընդդիմությունը, «ՀԱԿ»-ը, «ԲՀԿ»-ն, «Ազգային վերածնունդ» կուսակցությունը ապագա խորհրդարանում հայտնվելու շանս ունեն միայն իշխանության աջակցության դեպքում:

Գուցե նրանց նկատի ուներ Սերժ Սարգսյանը, երբ օգոստոսի մեկին խոսում էր ազգային համաձայնության իշխանության կամ կառավարության ձևավորման նպատակի մասին:

«Սասնա ծռերին» աջակցող քաղաքական ուժերն՝ այդ թվում «Ժառանգություն» կուսակցությունը, դեռևս պետք է կարողանան հաղթահարել վերջին իրադարձությունների և իշխանության հարվածների հետևանքները:

Մշուշոտ է նաև Նիկոլ Փաշինյանի «ինստիտուցիոնալ ընդդիմության» կամ Էդմոն Մարուքյանի քաղաքական նախաձեռնությունների հեռանկարները:

ՀՀ ԱԳ նախկին նախարար, «Համախմբում» կուսակցության նախագահ Վարդան Օսկանյանը ճիշտ է, երբ քաղաքական նոր փուլի նպատակ է համարում նոր լեգիտիմ գործունակ իշխանության ձևավորումը:

Սակայն չկան հիմքեր՝ կարծելու, որ այդ նպատակի կենսագործմանն ականատես կլինենք 2017-ի գարնան վերջին:

Սարգիս Հակոբյան