Եզդի համայնքն աշխարհին կոչ է անում ճանաչել և դատապարտել եզդիների ցեղասպանությունը

Եզդիների դեմ Հյուսիսային Իրաքում «Իսլամական պետություն» ահաբեկչական կազմակերպության կողմից իրականացված ցեղասպանության հետևանքով զոհվել է ավելի քան 10 հազար մարդ: Օգոստոսի 3-ին հրավիրված ասուլիսում այս մասին նշեց Հայաստանի եզդիների միության նախագահ Ազիզ Թամոյանը:

«Այսօր եզդի ժողովրդի համար սև օր է համարվում: Շանգալ նահանգի 70 գյուղ, որոնցում եզդիներ էին ապրում, ներկայումս դատարկ են: Եզդի բնակչության մի մասը սպանվել է, մի մասն արտաքսվել: Գյուղերից մեկում հայտնաբերվել են 50 եղբայրական գերեզման, որտեղ ամեն մի գերեզմանում եղել են 100-ից ավելի դիակ: «Իսլամական հանրապետության» ահաբեկիչները հանցանք են կատարել ոչ միայն եզդի ժողովրդի նկատմամբ: Նրանք նաև ահաբեկչություններ են իրականացնում աշխարհի տարբեր մասերում: Ուստի սա ամբողջ մոլորակի խնդիրն է: Այդ պատճառով «Իսլամական պետության» ահաբեկչական խմբավորումը պետք է արմատախիլ արվի»,- ընդգծեց Ազիզ Թամոյանը:

Հայաստանի հանրային ռադիոյի եզդիների համար հաղորդումների խմբագիր իրավաբան Հասան Թամոյանը շնորհակալություն հայտնեց հայ ժողովրդին՝ եզդիներին աջակցության համար:

«Ես շնորհակալություն եմ հայտնում հայ ժողովրդին և Հայաստանի պետական այրերին, որոնք առաջին իսկ օրվանից իրենց աջակցությունը հայտնեցին մեզ և կանգնեցին մեր կողքին: Մասնավորապես, ՀՀ նախագահ Սերժ Սարգսյանը դարձավ այն եզակիներից, ով ՄԱԿ-ում դատապարտեց եզդիների ցեղասպանությունը և կոչ արեց սատարել եզդի ժողովրդին»,- նշեց խմբագիրը: Նա տեղեկացրեց, որ Իրաքում եզդիների վիճակն առ այսօր մնում է օրհասական:

«Մեր տվյալներով, ցեղասպանությունից առաջ 1 միլիոնից ավելի եզդի էր ապրում Հյուսիսային Իրաքում: Ներկայումս եզդիների մեծամասնությունը թողել է իր տունը և փրկություն գտել տարբեր երկրներում: Նրանցից ոմանք Միջերկրական ծովում խեղդվեցին, մյուսները գտնվում են ճամբարներում, որտեղ ապրում են սարսափելի պայմաններում: 5-6 հազար կին և երեխա մնում են գերության մեջ: Կոչ եմ անում գերտերություններին, որպեսզի սատարեն եզդի ժողովրդին և օգնեն վերջ դնել այս հանցագործություններին»,- եզրափակեց Թամոյանը: