Instagram Stories-ն ուղղակի մրցակցության մեջ է մտնում Snapchat-ի հետ

Աշխարհ 3 Օգոստոս, 2016 18:15

Instagram հանրաճանաչ սոցիալական ցանցը, որը պատկանում է Facebook-ին, գործարկել է Instagram Stories նոր ծառայությունը, որը հնարավորություն է ընձեռում համացանցում միմյանց կարճ տեսագրություններ հաղորդել, իսկ այնուհետև դրանց կցել նկարներ, էմիկոններ և տեքստ, տեղեկացնում է BBC-ն:

Snapchat ցանցի նման Instagram-ն այժմ թույլ է տալիս լուսանկարներ և տեսագրություններ զետեղել սլայդ-շոուի տեսքով, որը պահպանվում է 24 ժամվա ընթացքում, իսկ այնուհետև ավտոմատ կերպով ջնջվում է:

Snapchat-ը, որը հայտնվել է 2011 թվականին, ժողովրդականություն էր վայելում այսպես կոչված «միլենիալների», հատկապես դեռահասների շրջանում, որոնք գնահատում են այս հավելվածին հատուկ ոչ պաշտոնականությունը: Դրանում տեքստերն անհետանում են ընթերցումից անմիջապես հետո, իսկ գրառումները՝ հրապարակումից մեկ օր անց:

Սա վերջին համազարկն է Facrbook-ի, որը 2012 թվականին 1 միլիարդ դոլարով գնել է Instagram-ը, և Snapchat-ի միջև պատերազմում, որն ընդամենը երեք տարի առաջ մերժել էր 3 միլիարդ դոլարով գնելու Facebook-ի առաջարկությունը:

Snapchat-ը ժողովրդականություն է վայելում երիտասարդների շրջանում, որոնք չեն ցանկանում, որ իրենց կարդան ծնողները, որոնք իրենց հերթին գերադասում են Facebook սոցալական ցանցը, որը 1,7 միլիարդ բաժանորդ ունի: Վերջերս Snapchat-ը ժողովրդականությամբ գերազանցեց Twitter-ին: Նրա շուկայական արժեքը գնահատվում է 18 միլիարդ դոլար:

Instagram Stories նոր հավելվածն առայժմ մատեչելի է սոսկ ԱՄՆ-ում, բայց արդեն առաջիկա շաբաթներին կկայանա դրա գլոբալ պրեմիերան: