Ինչ-որ Նավասարդյան որոշել է` Վերնիսաժի կրպակներն իրենը լինեն. մշակույթի գործիչները քննարկեցին խնդիրը և առաջարկներ ներկայացրին

Այսօր Հանրային խորհրդի մշակույթի ենթահանձնաժողովում Վերնիսաժին նոր կարգավիճակ տալու մասին քննարկում էր կազմակերպվել:

ԼՈւՐԵՐ.com-ի տեղեկացմամբ` Հանրային խորհրդարանի անդամ Արշակ Սադոյանն ասաց, որ ինքը դիմել է քաղաքապետ Տարոն Մարգարյանին, հանդիպել է նրա օգնական Օհանյանի հետ և նկատել, որ իսկապես բազառային հարաբերությունները ընդլայնվում են, ստեղծվել է մի իրավիճակ, երբ Վերնիսաժը փորձում են դարձնել բացօթյա վաճառատուն:

Հանրային խորհրդի անդամը նկատում է, որ բազմաթիվ երկրներում քաղաքի կենտրոնական հատվածներում հատուկ տեղեր են հատկացված լինում իրենց ժողովրդական արվեստների զարգացման և ցուցադրման համար: Վերնիսաժ անունը ամրագրված է և արժի պահել այդ անունը: Նա կոչ արեց պահպանել մշակութային այդ օջախը` առանձնացնելով հատկապես ասեղնագործությունը, քանի որ այդ արվեստը իսկապես պահանջում է հատուկ վերաբերմունք:

«Հըլը պատկերացրեք, Վերնիսաժը տվել են ինչ որ Նավասարդյանի, այս Նավասարդյանն էլ որոշել է՝ այս կրպակները իրենը լինեն և այնտեղ 15-20 տարի գործունեություն ծավալողներին հանում են: Բնական է, որ Նավասարդյանը կուզենա՝ բոլոր տաղավարները իրենը լինեն: Այս պարագայում համատեղ ճնշում պետք է իրականացնենք: Բացի այդ 1 քառակուսի գծամետրի համար նախկինում վճարում էին 100 դրամ, իսկ հիմա առանց անհարմար զգալու միանգամից 10 անգամ ավելացնում են վարձավճարը` դարձնելով 1000 դրամ: Թե ոնց են իրենց համար ստեղծած բիզնեսով քամելու ոչնչացնելու ազգային արվեստի մի կտոր` թքած ունեն»,- ասաց Սադոյանը` կոչ անելով համատեղ ջանքերով աջակցել, որպեսզի արվեստի այդ մի ճյուղն էլ չմեռնի մեր մոտ:

Հանձնաժողովի նիստը բավականին բուռն էր, քննարկումները այնքան թեժացավ, որ իր արտահայտած տեսակետների հանդիմանությանը չդիմացավ ավագանու անդամ Լևոն Իգիթյանը և դուրս եկավ մամլո սրահից:

Տարատեսակ կարծիքները հաշվի առնելով մշակույթի ենթահանձնաժողովը 3 կետից բաղկացած առաջարկությունների փաթեթ ընդունեց:

1 Պահպանել մշակութային տարածքը

2 Առաջնահերթություն տալ ժողովրդական արվեստի վարպետներին

3 բացառել վերավաճառք կատարողների աշխատանքը

Մշակույթի ենթահանձնաժողովի նախագահ մշակութաբան Գագիկ Մանասյանն ասաց, որ առաջարկներով կդիմեն Հանրային խորհրդի նախագահին, ով էլ իր հերթին տեղեկությունը կփոխանցի ՀՀ նախագահին և Երևանի քաղաքապետին: