Ազատության հրապարակում հանրահավաքն ավարտվեց` առանց երթ (ուղիղ միացում)

22:00

Ազատության հրապարակում հանրահավաքն ավարտվեց: Ցուցարարները պայմանավորվեցին վաղը ժամը 19:00-ին կրկին հավաքվել նույն վայրում:

21:22

Քիչ առաջ ելույթ ունեցավ «Ղարաբաղ կոմիտեի» անդամ Աշոտ Մանուչարյանը:

«Բոլոր երիտասարդները պետք է իմանան զինյալ պայքարի կոչերը, ուղղորդումները կատարվում են դրսից և դրսի թելադրանքով գործող իշխանավորներից: Այդ իշխանավորները փորձում են ցույց տալ, որ միայն զենքով կարելի է մի բան հաստատել: Զենքով արյան թատերաբեմ կարելի է վերածել ցանկացած երկիր, Հայաստանը չի գնալու այդ ճանապարհով»,- իր խոսքում նշեց Մանուչարյանը:

21:00

«Ազատության» հրապարակում մեկնարկեց ի պաշտպանություն ՊՊԾ գունդը գրաված «Սասնա ծռեր» խմբի կազմակերպված հանրահավաքը։

Նշենք, որ արդեն երկրորդ օրն է հանրահավաքը չի վարում «Հիմնադիր խորհրդարանի» անդամ Հարություն Աղլամազյանը։ Նախօրեին նրան կանչել էին ՀՔԾ, որից հետո՝ տուն վերադառնալիս անհայտ անձիք ծեծի էին ենթարկել։

Այժմ հանրահավաքը վարող չունի, ինչպես նաև չեն հրապարակվել անելիքների կոնկրետ պլան: 

Հանրահավաքը ինքնաբուխ է, յուրաքանչյուրը կարող է մոտենալ բարձրախոսին և ելույթ ունենալ։

Այսօր` ժամը 19:00-ին, հայտարարված էր հանրահավաք Ազատության հրապարակում.

Հիշեցնենք, որ Հուլիսի 17-ի առավոտյան մի խումբ զինված անձինք մուտք են գործել ՀՀ ոստիկանության պարեկապահակային ծառայության գնդի տարածք և բռնության սպառնալիքով պահել այնտեղ գտնվող անձանց՝ պահանջելով ազատ արձակել մոտ մեկ ամիս առաջ մի խումբ անձանց կողմից ապօրինի կերպով զենք և ռազմամթերք ձեռք բերելը, փոխադրելը և պահելը կազմակերպելու մեղադրանքով կալանավորված Ժիրայր Սեֆիլյանին: ՀՀ ոստիկանության պարեկապահակային ծառայության գնդի վրա հարձակման հետևանքով զոհվել է Ոստիկանության գնդապետ Արթուր Վանոյանը: Հարձակման ընթացքում հրազենային վնասվածքներ են ստացել ՀՀ Ոստիկանության գնդապետ Արամ Հովհաննիսյանը, Ոստիկանության փոխգնդապետ Հրաչ Խոստեղյանը, Ոստիկանության ենթասպա Գագիկ Մկրտչյանը:

Պատանդ վերցվածներն ազատ են արձակվել մեկ շաբաթվա ընթացքում, սակայն հուլիսի 27-ին նրանք կրկին պատանդ են վերցրել բուժօգնության հասած բուժաշխատողներին:

Հուլիսի 30-ին գնդի տարածքից դիպուկահարի կրակոցից զոհվել է ոստիկանության զորքերի ծառայող Յուրի Տեփանոսյանը:

Հուլիսի 31-ին զինված խմբի անդամները վայր են դրել զենքն ու հանձնվել:

Ուղիղ եթերը՝ 1in.am–ի և Ազատություն ռ/կ–ի