Սիրիական զորքերն ավելի քան 800 զինյալների են ոչնչացրել Հալեպի հարավում

Սիրիական զորքերը կասեցրել են «Ջեյշ ալ Ֆաթհ» զինված կոալիցիայի կազմավորումների գրոհները Հալեպի հարավ-արևմուտքում (Դամասկոսից 360 կիլոմետր հեռավորության վրա): Ինչպես իր էլեկտրոնային տարբերակում հաղորդել է Al Watan թերթը, սիրիական բանակի մարտիկները և աշխարհազորայինները մեկ օրում ոչնչացրել են ավելի քան 800 ահաբեկիչների, շարքից հանվել Է տասնյակ միավոր զրահատեխնիկա:

Հրատարակության տեղեկություններով՝ կառավարական ուժերը կորցրած դիրքերի վերադարձման գործողությանն են պատրաստվում Ռամուսի հարավային ծայրամասում ռազմական ուսումնարանների համալիրի տարածքում: Նրանք նախկինի պես պահպանում են պատվարը ցեմենտի գործարանի շրջանում՝ զինյալներին թույլ չտալով ճեղքել-դուրս գալ քաղաքի արևելյան շրջաններ, որոնք շրջապատված են զորքերով:

Սիրիայի զինված ուժերի հրամանատարության ներկայացուցիչը հերքել է ընդդիմադիր ձայնափողերի հաղորդումներն այն մասին, թե հրոսակային խմբավորումներն իբր հասել են Շեյխ Սայիդ հարավային արվարձան: «Ահաբեկիչների և վարձկանների ջախջախման ռազմական գործողությունը շարունակվում է, և քաջարի սիրիական բանակը լի է վճռականությամբ թշնամուն հարված հասցնելու Հալեպի մատույցներում»,- հայտարարել է նա:

Մինչդեռ Al Mayadeen հեռուստակայանը փոխանցել է «Ջեյշ ալ Ֆաթհ» խմբավորման պաշտոնական հաղորդագրությունը, որը հայտարարել է «հանուն ամբողջ Հալեպի ազատագրման ճակատամարտն սկսելու մասին»: Այս նպատակով արագորեն քաղաքի հարավային արվարձաններ հրոսակային կազմավորումներ են տեղափոխվում հարևան Իդլիբի և Համայի նահանգներից, հաղորդել է ՏԱՍՍ-ը: