Մակեդոնիայում քսանից ավելի մարդ է զոհվել ջրհեղեղի հետևանքով
Աշխարհ
Մակեդոնիայի Սկոպիե մայրաքաղաքում առնվազն 21 մարդ է զոհվել ջրհեղեղի հետեւանքով, որը քաղաքը պատուհասել է լույս օգոստոսի 7-ի գիշերը, տեղեկացնում է BBC News-ը:
Զոհերի մարմինները հայտնաբերվել են կիրակի առավոտյան, դրանցից մի քանիսը՝ ջրասուզված ավտոմեքենաներում: Reuters-ի տեղեկատվության համաձայն՝ զոհվածների թվում կան երեխաներ, մի քանի մարդ անհայտ կորած է համարվում: Քսանից ավելի տուժածների տեղափոխել են հիվանդանոցներ:
Տեղումների ընդհանուր քանակը հասել է 93 միլիմետրի, ինչը գերազանցում է ամսական նորման: Առանձին շրջաններում ջրի մակարդակը փողոցներում հասել է 1,5 մետրի:
Սկոպիեում շենքերի մեծ մասը հեղեղված է եւ հոսանքազրկված: Երկրի հյուսիս-արեւելքում արտաքին աշխարհից կտրված են մնում երեք գյուղեր: Բացի այդ, ոստիկանության տվյալներով Ստայկովցի եւ Ռադիշանի գյուղերի միջեւ արգելափակման մեջ են հայտնվել շուրջ 70 ավտոմեքենաներ:
Մակեդոնիայի իշխանությունները 15 օրով արտակարգ դրություն է սահմանել Սկոպիեում ու Տետովո քաղաքում եւ ոստիկանության ուժեր եւ խմելաջրով բեռնատարներ են ուղարկել առավել տուժած շրջաններ: Երկրի վարչապետ Նիկոլա Տոդորովը պատահածը «աննախադեպ մասշտաբների աղետ» է որակել:
ՈՒՂԻՂ ԵԹԵՐ
Ամենադիտված 
Այսօր մեր ընտանիքին բաժին հասավ ամենածանր կորուստը
