Ռուսական Տու-22Մ3 վեց հեռահար ռմբակոծիչներ Սիրիայում հարված են հասցրել ԻՊ-ի օբյեկտներին

Ռուսական Տու-22Մ3 վեց հեռահար ռմբակոծիչներ Սիրիայում հարվածներ են հասցրել «Իսլամական պետություն» (ԻՊ) ահաբեկչական կազմակերպության օբյեկտներին Պալմիրայից դեպի արևելք և հյուսիս - արևմուտք ընկած շրջաններում: Այս մասին հայտնել է ՌԴ-ի պաշտպանության նախարարության մամուլի ծառայության ներկայացուցիչը:

«2016 թվականի օգոստոսի ութին վեց Տու-22Մ3 հեռահար ռմբակոծիչներ, որոնք թռել են Ռուսաստանի Դաշնության տարածքից, բեկորաֆուգասային ռազմամթերքով կենտրոնացված հարված են հասցրել «Իսլամական պետություն» ահաբեկչական խմբավորման օբյեկտներին Պալմիրայից դեպի արևելք և հյուսիս - արևմուտք ընկած շրջաններում՝ էս Սուխնե և Արաք բնակավայրերի մերձակայաքում»,- ասված է հաղորդագրության մեջ:

Հարվածի հետևանքով ոչնչացվել է զինյալների կառավարման կետը և խոշոր մարտական ճամբարն էս Սուխնե քաղաքի մերձակայքում: Պալմիրայի և Արաքի շրջաններում ոչնչացվել են ահաբեկիչների կառավարման կետերը, զինամթերքի և սպառազինության ստորգետնյա պահեստը, հետևակի երեք մարտական մեքենա, 12 արտաճանապարհային ավտոմեքենաներ՝ խոշոր տրամաչափի գնդացիրներով, ինչպես նաև հակառակորդի մեծ քանակությամբ կենդանի ուժ, հաղորդել է ՏԱՍՍ-ը: