Էրդողան-Պուտին բանակցություններում առաջին պլանում կլինի տնտեսական համագործակցությունը

Այսօր Սանկտ-Պետերբուրգում Թուրքիայի նախագահ Թայիփ Էրդողանի եւ ՌԴ նախագահ Վլադիմիր Պուտինի միջեւ ընթացող բանակցություններում առաջին պլանում տնտեսական համագործակցությունը զարգացնելու հարցն է:

Այս մասին հայտնում է «Անատոլու» լրատվական գործակալությունը:

Ըստ գործակալության' կողմերը մտադիր են անցած նոյեմբերին ռուսաստանյան ինքնաթիռի հետ կապված ճգնաժամից հետո առաջին հանդիպմանը վերակենդանացնել մինչ այդ ծրագրած' «100 մլրդ դոլար առեւտրային ծավալով» տնտեսական համագործակցությունը զբոսաշրջության, պարենի եւ արդյունաբերության ոլորտներում:

Թուրքիայի պետական վիճակագրական կոմիտեի տվյալներով' անցած տարվա դրությամբ Թուրքիայից ապրանքների ներկրումով Ռուսաստանը զբաղեցնում էր երկրորդ տեղը, իսկ այդ երկիր ապրանքներ արտահանելով' երրորդ տեղը:

2008 թվականին ընդհանուր առմամբ 38 մլրդ դոլար մակարդակի ռուս-թուրքական արտաքին առեւտրային ծավալը նավթի գների անկումից հետո 2015 թվականին կազմել էր 23,3 մլրդ դոլար:

Ինքնաթիռի ճգնաժամից հետո երկու երկրների միջեւ առեւտրային շրջանառության ծավալը այս տարվա 6 ամիսներին, անցյալ տարվա նույն ժամանակաշրջանի համեմատ, 60,5 տոկոսով կրճատվել է' հասնելով 737 մլն դոլարի:

Ռուսաստանյան ԶԼՄ-ներն ավելի վաղ հայտնել էին, որ նոյեմբերին ռուսաստանյան Սու-24 ինքնաթիռի թուրքական օդուժի կողմից խոցումից հետո երկու երկրների հարաբերություններում ծագած լարվածության պատճառով 2016 թվականի հունվարի 1-ից Մոսկվայի կողմից թուրքական ապրանքների վրա դրված արգելանքի եւ դեպի Թուրքիա ռուս զբոսաշրջիկների հրաժարումից հետո Թուրքիայի տնտեսությունը մոտ 9 մլրդ դոլարի վնաս է կրել: