Առաջին «սիգնալները»

Երեկ առաջին անգամ խորհրդարան էր ներկայացել վարչապետ Կարեն Կարապետյանն՝ ԱԺ-Կառավարություն հարց ու պատասխանին մասնակցելու:

Իհարկե որոշակի դիսկոմֆորտ կա, երբ վարչապետը խորհրդարան է ներկայանում կառավարության դեռևս չփոփոխված կազմով: Ընդ որում, դիսկոմֆորտն առաջին հերթին վերաբերում է նախարարներին, որոնցից ոմանք «ճամպրուկային տրամադրություններ» ունեն: Ինչ վերաբերվում է Կարապետյանին՝ նա երեկ բավականին լավ տպավորություն թողեց՝ ակնհայտորեն դրականորեն տարբերվելով իր նախորդից: Օրինակ՝ վարչապետին չդավաճանեց քաղաքական հանդուրժողականության սկզբունքը, երբ պատգամավոր Տիգրան Ուրիխանյանը նրա նկատմամբ բացահայտ հակաքարոզչություն իրականացրեց:

Ամենակարևորն այն է, որ ընթացիկ վիճակին և սկզբունքներին վերաբերող հարցերում Կ. Կարապետյանը տուրք չտվեց պոպուլիզմին:

Նա անկեղծորեն խոստովանեց, որ տնտեսության վիճակը վատ է, սակայն չտրվեց գայթակղությանը և չքննադատեց իր նախորդներին կամ չշռայլեց խոստումներ՝ պատգամավորներին և հանրությանը դուր գալու նպատակով:

Հակամենաշնորհային քաղաքականության անհրաժեշտության մասին խոսում են բոլորը, սակայն նորանշանակ վարչապետը դարձյալ ոչ պոպուլիստական մոտեցում ցուցաբերեց՝ հիմնավորելով բնական մենաշնորհի օրինաչափությունը:

Ավելի ուշ լրագրողների հետ զրույցում Կարեն Կարապետյանը հասկացրել է, որ սեփականության վերաբաժանում չի լինելու: «Ուրիշի բիզնեսը որևիցե կերպ չենք խլելու»,- ասել է նա: Սակայն Կարապետյանի ամենակարևոր բացահայտումը վերաբերում էր կադրային քաղաքականությանը, որի հիմքում լինելու է ոչ թե կուսակցականությունն, այլ պրոֆեսիոնալիզմը:

Հուսանք, որ այլևս անկուսակցական նախարարները ստիպված չեն լինի «փաթեթով» հանրապետական դառնալ, իսկ պաշտոնների հնարավոր հավակնորդները չեն վազի Մելիք Ադամյան փողոց՝ «կուսակցական մկրտություն» ստանալու:

Սարգիս Հակոբյան