Ֆրանսիայում Հայոց ցեղասպանության ժխտման վերջնական քրեականացումը կախված է Օլանդի վճռականությունից

Ֆրանսիայում Հայոց ցեղասպանության ժխտման վերջնական քրեականացումը կախված է Ֆրանսիայի նախագահ Ֆրանսուա Օլանդի վճռականությունից: Այս մասին «Արմենպրես»-ի մամուլի սրահում հրավիրված ասուլիսին նշեց ՀՀ ԳԱԱ Պատմության ինստիտուտի Հայկական հարցի և Հայոց ցեղասպանության պատմության բաժնի վարիչ Արմեն Մարուքյանը:

«Հուսանք, որ Ֆրանսիայի նախագահ Ֆրանսուա Օլանդն ավելի սկզբունքային կգտնվի, քան իր նախորդը: Քաղաքական իրադրությունն այնպիսին է, որը մեծապես ավելի նպաստավոր է այս օրենքի ընդունման համար: Հուսանք, որ գործընթացը կավարտվի մեզ համար դրական ելքով: Քաղաքական նպաստավոր իրադրություն ասելով նկատի ունեմ այն, որ ձախողվեց ԵՄ-Թուրքիա համաձայնությունը միգրանտների հետ կապված, նկատի ունեմ նաև Թուրքիայի նկրտումները և այլն»,-ասաց Արմեն Մարուքյանը:

Արմեն Մարուքյանը համոզված է, որ այս անգամ ևս Սենատի ընդունումից հետո ժխտումը քրեականացնելու օրինագիծը կմտնի Սահմանադրական խորհուրդ: Նա հիշեցրեց, որ 2012 թվականին Սենատում այդ նախագծին կողմ էր քվեարկել 127, դեմ' 86 պատգամավոր: Եվ ձայների այդ հարաբերակցության պայմաններում թուրքերին հաջողվել էր 60 պատգամավորի ստորագրություն ստանալ հարցը Սահմանդրական խորհուրդ մտցնելու համար: Այս անգամ նախագծին կողմ է քվեարկել 156, դեմ' 146 պատգամավոր: Արմեն Մարուքյանը չի կասկածում, որ ձայների այս հարաբերակցության պայմաններում թուրքերին կհաջողվի հարցը մտցնել սահմանադրական խորհուրդ, հետևաբար, այստեղ կարևորվում է նախագահ Օլանդի վճռականոթյունը:

«Մենք գիտենք, թե թուրքերն ինչպիսի ճնշումներ են կիրառել Ֆրանսիայի Սենատի վրա մինչև վերջին պահը, թուրք-ֆրանսիական բարեկամության ընթրիքը եղավ, անցկացվեցին այլ հանդիպումներ: Սա խոսում է այն մասին, որ թուրքերն ավելի մեծ ջանքեր են գործադրում հարցը տապալելու համար որոշակի օբյեկտիվ և սուբյեկտիվ պատճառներով: Հասկանում են, որ որոշակի քաղաքական իրադրություն է փոխվել, իրենք մտահոգվում են, որ 2012 թվականի զարգացումները չեն կարողանա կրկնել»,-ավելացրեց Արմեն Մարուքյանը:

Արմեն Մարուքյանը կարևորեց մեկ հանգամանք, ըստ որի, այս անգամ օրինագծի վրա աշխատած փաստաբանները սերտորեն համագործակցել են Կառավարության փաստաբանների հետ' հաշվի առնելով այն դիտարկումները, որոնք 2012 թվականին Սահմանադրական խորհուրդը շահարկեց հարցը մերժելու համար:

«Դրանից բացի, այս անգամ փաստաբանները նաև համաեվրոպական օրնսդրության նորմեր են ներառել: Հիշենք, որ 2008-ին ստորագրվել է շրջանակային համաձայնագիր ռասիզմի և այլատյացության որոշ դրսևորումների նկատմամբ քրեական օրենսդրության միջոցով պայքարելու մասին, որին կողմ է Ֆրանսիան: Այս փաստաթուղթը ենթադրում է, որ ԵՄ անդամ երկրներն օրսնդրությունը համաձայնեցնեն այս համաձայնագրին»,-հավելեց Արմեն Մարուքյանը: Նրա խոսքով, եթե այս անգամ հաջողվի Ֆրանսիայում Հայոց ցեղասպանության ժխտումը վերջնական քրեականացնել, ապա դա կարող է խթան լինել, որ այլ երկրներում հայկական համայնքներն այս հարցում հաջողություններ ունենան: Ամեն դեպքում Արմեն Մարուքյանը հիշեցրեց, որ Հայոց ցեղասպանության խնդիրը դարձել է միջոց, որով եվրոպական տերությունները փորձում են իրենց հարաբերությունները հստակեցնել Թուրքիայի հետ: