Հանրապետականը ցայտնոտային իրավիճակում է հայտնվել…

Հայտնի բան է, որ ընտրություններին կամ դրանց նախորդող շրջանում ոչինչ այնքան վճռորոշ նշանակություն չի ունենում դրանց արդյունքների վրա, որքան մարդկանց, քաղաքացիների վրա հոգեբանական ներազդեցություն ունենալուն, մարդկանց մտածելակերպի վրա ազդելուն միտված զանազան տրյուկները: Այդ տրյուկներից մեկն էլ, ինչ խոսք, գլխավորապես իշխանությունների կողմից գրեթե մշտապես կիրառվող յուրատեսակ հնարքն է, որով նախընտրական շրջանում ՀՀԿ երևելի դեմքերը դեմքի ինքնավստահ արտահայտությամբ հայտարարում են, թե Հանրապետականի դեմ խաղ չի լինելու, թե ժողովրդի, հանրության շրջանում ՀՀԿ-ի վարկանիշն այնքան բարձր է, որ մնացած բոլոր կուսակցություններն ու քաղաքական ուժերը ստիպված են լինելու բավարարվել ընդամենը Հանրապետականի խնջույքի սեղանից գետին թափված փշրանքներով և այլն: Դիցուք՝ ՀՀԿ-ական Սուքիաս Ավետիսյանն էր, մասնավորապես, իր վերջին ասուլիսում գոռոզամտորեն հայտարարել, թե հանրապետականին 60%-ը լրիվ բավարար է' ըստ էության' ակնարկելով, թե՝ եթե շատ «վիզ դնեն», կարող են և 100%-անոց արդյունք էլ գրանցել:

Իհարկե, միգուցե այնքան էլ անհնարին չլիներ' հավատալու, ասենք, նույն Ավետիսյանի ամպագորգոռ հայտարարությանը, եթե մեջտեղ չգար մի չափազանց խոսուն, բայց այնքան էլ դեկլարատիվ բնույթ չկրող իրողություն. 2017-ի ապրիլին ընդառաջ, պարզվում է՝ ՀՀԿ-ականները տարբեր համայնքներում իսկական որս են սկսել ու ջանում են մարդկանց ամեն կերպ համոզել' ընդգրկվելու իրենց ռեյտինգային ցուցակներում, որպեսզի գոնե այդպես կարողանան ուրիշների դեմքով ձայներ ստանալ: Պարզվում է նաև' կուսակցությունը ռեյտինգային ցուցակներում ընդգրկվելու առաջարկ է անում անգամ նրանց, որոնց պոպուլյարության մակարդակը գործնականում զրոյական է: Ավելին' անում են ամեն ինչ' նույնիսկ նախկին պաշտոնյաներին իրենց թևի տակ քաշելու ու նրանց ցուցակներ մտցնելու:

Թե հատկապես ինչով կարող է պայմանավորված լինել չափից դուրս ինքնավստահ այս կուսակցության նմանօրինակ պահվածքը կամ դրա շարքերում հետզհետե սրվող խուճապը, առանձնապես դժվար չէ կռահել. իրականում այստեղ վաղուց հասկացել են, որ ավելի քան 50%-անոց աղքատությամբ երկրում հավակնել, ասենք, 40-50% ձայների, կարող է միայն խելապակասը: Ուստի' որոշել են նախքան ընտրակեղծարարություններ թույլ տալն ու ընտրությունների արդյունքները կեղծելը' ստեղծել այնպիսի մթնոլորտ, որ ինչ էլ անեն, ինչ թիվ էլ նկարեն, ժողովրդի շրջանում տարակուսանք չառաջանա: Բացի սա' փորձում են, ըստ էության, հուսահատություն տարածել հասարակության շրջանում, որ երբ ընտրակաշառքներ առաջարկեն մարդկանց, վերջիններս, անհուսությունից դրդված, փողին գերի գնան ու փաստացի՝ վաճառեն սեփական ձայնը:

Չնայած այս ամենին, սակայն, իրենք էլ են հասկանում, որ իրականում կանգնած են լրջագույն փորձության առաջ, իսկ տեսախցիկների առաջ դրսևորած ինքնավստահությունն ընդամենը մի թույլ փորձ է' կեղծ շղարշ ստեղծելու:

Իսկ այս ամենն, իր հերթին, կարող է նշանակել մեկ բան' իրականում հայաստանյան ընդդիմության շանսերն ու հնարավորությունները' ջախջախիչ պարտության մատնելու իշխողներին, զուտ օբյեկտիվորեն՝ չափազանց բարձր են: Այստեղ հարցը միայն այն է, թե որքանով կկոնսոլիդացվեն ընդդիմության տարբեր ճյուղերն ու արդյոք նրանցից ամեն մեկն իր մեջ կգտնի՞ համապատասխան կամք' պայքարելու ոչ թե միմյանց, այլ' գլխավոր քաղաքական ախոյանի' Հանրապետականի դեմ. սա է, թերևս, այն կարևորագույն հարցը, որն այսօր առկախված է ընդդիմության առաջ:

Դավիթ ԲԱԲԱՆՈՎ