Օլիմպիական խաղերում դահուկորդ Միքայել Միքայելյանը 72-րդն է

Դահուկորդ Միքայել Միքայելյանը Փհենչհան 2018-ի սպրինտի որակավորման փուլում գրավել է 72-րդ հորիզոնականը: Այսօր՝ փետրվարի 13-ին, այդ մրցաձեւում հանդես է եկել 80 մարզիկ: Առաջին 30 մասնակիցների թվում տեղ չզբաղեցնելով՝ Միքայելյանը չի հաղթահարել որակավորման փուլը:

Այսօր նույն մրցաձեւի կանանց պայքարում Հայաստանը պետք է ներկայացներ Կատյա Գալստյանը: Նրա անունը, սակայն, բացակայում է մասնակիցների ցուցակից:

Փհենչհանում անցկացվող ձմեռային 23-րդ օլիմպիական խաղերում Միքայելյանի հաջորդ մեկնարկը փետրվարի 16-ին է: Նա հանդես կգա 15 կմ ազատ ոճում:

Փետրվարի 15-ին Կատյա Գալստյանը կպայքարի 10 կմ ազատ ոճում: ՀՀ մյուս ներկայացուցիչ Աշոտ Կարապետյանը փետրվարի 18-ին կմրցի հսկա ոլորավայրէջքում, իսկ 22-ին՝ հատուկ ոլորավայրէջքում:

Օլիմպիական խաղերը մեկնարկել են փետրվարի 9-ին եւ կավարտվեն 25-ին: