Առաջին հայ թեկնածուն՝ Անտվերպենի քաղաքապետարանի ընտրություններում

Հոկտեմբերի 14-ին Բելգիայի` մեծությամբ 2-րդ` Անտվերպեն քաղաքում տեղի է ունենալու քաղաքապետարանի պատգամավորների ընտրությունը, որին մասնակցելու է 13 կուսակցություն: Ի դեպ, առաջին անգամ Անտվերպենի քաղաքապետարանի ընտրություններին մասնակցում է հայազգի թեկնածու: «Նոր ֆլամանական դաշինք» (NVA) կուսակցության ցուցակում ներկայացված է նաև մեր հայրենակից, Բելգիայի հայկական կազմակերպությունների ընդհանուր համակարգող, ՀԲԸՄ Եվրոպայի կառույցի ներկայացուցիչ, «ՆՈՒԱՐԴ» մշակութային միության երիտասարդական կառույցի ղեկավար Շահնուր Մինասյանը: Վերջինս բելգիական քաղաքականության մեջ է դեռևս 2001թ.-ից:

ԼՈւՐԵՐ.com-ի թղթակցի հետ զրույցում Շահնուր Մինասյանն ասաց, որ առաջարկը ստացել է քաղաքապետից և չի մերժել, քանի որ գիտակցել է՝ այդ միջոցով կարող է բարձր ատյաններում լսելի դարձնել նաև հայկական խնդիրները: 

««Նոր ֆլամանական դաշինք»-ը իշխող կուսակցություն է, ունի 37 % ձայն: Ընտրակարգը համամասնական է: Ինձ համար մեծ պատիվ է ընտրություններին մասնակցել երկրում քաղաքական ծանր կշիռ ունեցող ուժի կողմից: Այն ունի բավականին հզոր ներուժ և որոշիչ դեր: Երկրի մեջ պետական որոշիչ դերակատարում ունեցող պաշտոնյաները մաս են կազմում հենց այս կուսակցության, այդ թվում՝ քաղաքապետը, որը նաև ամբողջ կուսակցության նախագահն է»,- ասաց Մինասյանը: 

«Նոր ֆլամանական դաշինք» Անտվերպենի քաղաքային խորհրդի ցուցակում Շահնուր Մինասյանը 37-րդ տեղում է գտնվում: Պատգամավորի թեկնածուն իր հաջողության հնարավորություններն ընտրություններում բավականին մեծ է գնահատում. «Ըստ ամենայնի՝ կկարողանամ հավաքել համապատասխան ձայներ, որպեսզի հայտնվեմ Անտվերպենի քաղաքային խորհրդում. եթե հայ համայնքի կեսն էլ մասնակցի՝ հնարավոր է հասնել հաջողության: Անցնելու դեպքում կկարողանամ ավելի շատ արծարծել համայնքի հիմնախնդիրները, զբաղվել հայերի և ազգային այլ փոքրամասնությունների՝ Անտվերպենի կյանքում ներգրավման գործընթացով, լեզվի և մշակույթի պահպանմամբ, ինչպես նաև ակտիվ աշխատանք տանել հայ-բելգիական հարաբերություններն ամրապնդելու ուղղությամբ»,- նշեց «Նոր ֆլամանական դաշինք» (NVA) կուսակցության ցուցակում ընդգրկված հայազգի թեկնածուն:

Շահնուր Մինասյանն այդքան էլ մտահոգված չէ թուրք-ադրբեջանական ուժերի՝ իր դեմ հակաքարոզչություն կազմակերպելուց. «Ադրբեջանական գործոնը չի կարող խանգարել, քանի որ ընտրությունները համամասնական են, այսինքն՝ միայն ինձ չեն կարող խանգարել, խանգարելիս՝ կուսակցությանը պետք է փորձեն խանգարել, որը չի ստացվի: Ընդհանրապես, թուրքական լոբբինգը մի չափազանցված մեծ փուչիկ է, որը հնարավոր է շատ արագ պայթեցնել: Իսկ ադրբեջանական լոբբինգ, որպես այդիսին, գոյություն չունի»,- ասաց նա՝ ընդգծելով, որ Բելգիան ընդունել է Հայոց ցեղասպանությունը. այդ առումով ,մենք խոցելի չենք, իրենք՝ խոցելի են: 

Նրա խոսքով՝ Բելգիայի հայ համայնքի կապը հայրենիքի հետ՝ մշտապես եղել և շարունակվում է. «Այն բարձր մակարդակի վրա է, քանի որ մեր գործունեությունն ուղղված է անմիջապես հայապահպանմանը: Բելգիայում ունենք հայատառ ամսաթերթ, որը միակն է այստեղ, իսկ գլխավոր խմբագիրը հայրս է՝ Գևորգ Մինասյանը: Ունեցել ենք պարի խումբ, դպրոց, տպագրել ենք բազմաթիվ գրքեր: Ցեղասպանության ճանաչման հարցը բարձրացրել ենք և հաջողվել է հասնել նրա ընդունմանը ֆլամանական պառլամենտում՝ 2015թ.»,- եզրափակեց Մինասյանը:

Սոնա Հարությունյան