«Պարոն Հայրապետյանն արդեն անցյալում է»

«Արարատ» ֆուտբոլային ակումբի տնօրեն Տիգրան Ղարաբաղցյանի համոզմամբ՝ Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի՝ (Նեմեց Ռուբո) 16 տարվա ղեկավարած կառույցը նորանշանակ տնօրեն Արթուր Վանեցյանը շատ լավ կկառավարի: 

Տիգրան Ղարաբաղցյանը ԼՈՒՐԵՐ.com-ի հետ զրույցում չցանկացավ որևէ մեկնաբանություն տալ Ռուբեն Հայրապետյանի ղեկավարման տարիների մասին, սակայն առանձնացրեց մի քանի կարևոր կետ, որոնց վրա պետք է ուշադրություն դարձնել: «Շատ կարևոր է, որ նպաստեն մանկապատանեկան, մասսայական և մարզային ֆուտբոլի զարգացմանը: Իսկ պարոն Հայրապետյանն արդեն անցյալում է, չեմ ուզում ոևէ բան ասել նրա մասով: Հիմա միայն Երևանում է ֆուտբոլը գնում, ինչը նորմալ չէ: Պետք է մարզերում էլ ֆուտբոլային ակումբներ կառուցենք և համոզված եմ, որ պրոֆեսիոնալ ֆուտբոլիստներ հաստատ կգտնենք մարզերից»,-մանրամասնեց «Արարատ» ֆուտբոլային ակումբի տնօրենը:  

ՀՖՖ նախկին մարզիչ Վարդան Մինասյանի պաշտոնավարման վերաբերյալ՝ մեր զրուցակիցը դրական գնահատական տվեց, քանի որ, ըստ նրա՝ Մինասյանը բազմիցս ցույց է տվել իր պրոֆեսիոնալիզմը, սակայն թե ինչու ՀՖՖ նախագահի ընտրություններից հենց մեկ օր առաջ ներկայացրեց հրաժարականի դիմումը՝ Ղարաբաղցյանի համար մնում է անհասկանալի. «Երևի ցանկություն չի ունեցել աշխատել նոր ղեկավարության հետ»:

Մեր այն դիտարկմանը, թե Ռուբեն Հայրապետյանի հետ է աշխատել, դրա՞ համար որևէ մեկնաբանություն չի ուզում տալ, թե՞ այլ բան կա, Ղարաբաղցյանը պատասխանեց. «Չէ՛, իրար հետ աշխատելը չէ խնդիրը: Ինչ արել՝ արել է. ակադեմիաներ է կառուցել, ինչ է եղել, ոնց է եղել՝ չեմ ուզում մեկնաբանել»:

Իսկ արդյո՞ք պետք էր նոր ընտրություններ և նոր ղեկավար կազմ, Տիգրան Ղարաբաղցյանը նկատեց. «Փոփոխություններ, միանշանակ, պետք են, քանի որ ինչ-որ բան պակասում էր»: Իսկ թե ինչն էր պակասում՝ «Արարատ» ֆուտբոլային ակումբի տնօրենը չկարողացավ պատասխանել: 

Վերջում, խոսելով կոռուպցիոն ռիսկերի մասին, Տիգրան Ղարաբաղցյանը վստահեցրեց, որ ՀՖՖ-ում կոռուպցիա չի եղել. «Ֆուտտբոլի ֆեդերացիայում կոռուպցիայի մասին չեմ լսել ու չեմ էլ կարող պատկերացնել, որ նման բան եղել է»: 

Հիշեցնենք, որ ՀՀ Ազգային անվտանգության ծառայության տնօրեն Արթուր Վանեցյանը սեպտեմբերի 22-ին ընտրվեց Հայաստանի ֆուտբոլի ֆեդերացիայի նախագահ: 

Արմինե Միքայելյան