«Փոխանակ բուժեն՝ ձերբակալում են». զինհաշմանդամի մայրն ահազանգում է

Զինհաշմանդամ, պայմանագրային նախկին զինծառայող Դավիթ Հակոբյանի մայրն ահազանգում է. երեկ Մուրացանի հոսպիտալում ձերբակալել և Արմավիրի ՔԿՀ են տեղափոխել առաջին կարգի զինհաշմանդամ որդուն: ԼՈւՐԵՐ.com-ի թղթակցի հետ զրույցում Դավիթի մայրը՝ տիկին Գայանեն փոխանցեց, որ մի քանի օր է` որդուն անհանգստացնում էին ոստիկանությունից:

Բանն այն է, որ դեռևս 2015-ին, ՊՆ-ի անգործությունից հուսալքված երիտասարդը 3 տարի առաջ կտրուկ քայլի է դիմել. նա իր մասին հիշեցնելու համար զանգել է ոստիկանություն՝ հայտնելով, որ Բաղրամյան 26-ում, նախկին Պնախարար Սեյրան Օհանյանի աշխատասենյակում և հոպիտալում ռումբ կա, որի համար կալանավորել են, բանտում 16 ամիս է անցկացրել, որից հետո էլի հանգիստ չեն տալիս:

«Որդուս առանց որևէ բան ասելու` հոսպիտալից ձերբակալել են: Ասում  եմ՝ ինչո՞ւ եք կալանավորել,  ասում են՝ խելոք մնա` քեզ էլ կկալանավորենք: Ես մանկապարտեզի երեխա՞ եմ, որ նման ձևով են խոսում ինձ հետ: Մենք պարբերաբար նամակներ ենք գրել պարոն Փաշինյանին, բայց ապարդյուն, որևէ պատասխան չենք ստացել: Մեր խնդրանքն է, որ մեզ ընդունի, լսի, ուսումնասիրի թղթերը: Իմ երեխան թուրք չի, իրենց զինվորն է եղել, փոխանակ բուժեն, ձերբակալում են: Էնքան են անելու՝ վերջը երեխաս ինքն իր գլուխն ուտի, երեկ ուզել է իրեն կախի, ինչքա՞ն կարելի նման քայլի դրդել, ինչի՞, նման քննիչ է լինո՞ւմ»,-մեզ հետ զրույցում նշեց տիկին Գայանեն: 

Դավիթ Հակոբյանը մշտապես նշել է, որ նաև Պնախարարներին է մի քանի անգամ նամակներ գրել, բայց անարդյունք, որևէ պատասխան չի ստացել. «Մարդ պետք է պարտադիր թշնամուց տուժած լինի, որ ուշադրություն դարձնե՞ն»,- նշել է Դավիթը:

Նախկին պայմանագրային զինծառայող Դավիթ Հակոբյանը Արմավիրի մարզի Մայիսյան գյուղից է: 2006-2008թ. Արցախում սահմանային զորամասում է ծառայել, առողջական խնդիրներ չի ունեցել նաև պայմանագրային ծառայության մտնելիս:

Դավիթը 1-ին խմբի զինհաշմանդամ է, հաշմանդամություն ձեռք է բերել, ինչպես ինքն է նշում, հոսպիտալի «անորակ» բժիշկների անփույթ վերաբերմունքի պատճառով: Արդեն 6 տարի է`  կորցրել է առողջությունը, և արդեն 6 տարի անդադար դիմում է տարբեր մարմինների՝ առողջական վիճակի, դրա հետևանքների և պատճառների վրա ուշադրություն հրավիրելու համար, բայց ապարդյուն:

Ամեն ինչ սկսվել է 2012 թվականին, երբ նա ծառայում էր խաղաղապահ զորքերում: Ծառայության ժամանակ որովայնի շրջանում ցավեր է զգացել, վիճակը կտրուկ վատացել է և տեղափոխել են Մուրացանի հոսպիտալ: Այնտեղ առանց որևէ հետազոտություն կատարելու՝ վիրահատել են, ըստ էպիկրիզի ՝ աղիքի խոցն է կարվել աղեոլորքից հետո: Մոր խոսքով՝ սխալ վիրահատության պատճառով երկրորդ վիրահատության կարիք է առաջացել և 8 ժամ անց կրկին վիրահատել են: 2-րդ վիրահատության ժամանակ ընկել է կոմայի մեջ և 19 օր հետո միայն դուրս է եկել կոմայից, որից հետո շուրջ մեկուկես տարի անշարժացած, գամված է եղել անկողնուն, ոչ ոքի չի ճանաչել, չի ունեցել ո՛չ գիտակցություն, ո՛չ շարժունակություն: Հետո բուժում է ստացել «Կարմիր խաչ»-ում, որտեղ և սկսել է քիչ- քիչ վերականգնվել: Այժմ էլ ունի մի շարք առողջական խնդիրներ՝ կայուն մնացորդային ձախակողմյան հեմիպարեզ, ձախ թևի թուլություն, գլխուղեղի կիստա, տեսողության թուլացում:

Ըստ Դավիթի մոր՝ վերոնշյալ խնդիրներն առաջացել են հոսպիտալի բժիշկների անփույթ վերաբերմունքի հետևանքով, նրանց պատճառով ստիպված է հաշմանդամի կարգավիճակում մնալ: Հոսպիտալի բժիշկները քաջ գիտակցելով, որ իրենց մեղավորությամբ է կատարվել ամեն ինչ, խոստացել են ուղարկել Գերմանիա բուժման, սակայն հետո խաբել են և ոչ մի տեղ չեն ուղարկել, հետո նախկին Պաշտպանության նախարար Սեյրան Օհանյանը նույնպես խոստացել է ուղարկել բուժման և կրկին ոչինչ չարվեց:

Դավիթն իր վրա ուշադրություն հրավիրելու համար դիմել է ծայրահեղ քայլերի: Պարբերաբար զանգել է հոսպիտալ, ՊՆ և ասել, որ այնտեղ ռումբ կա դրված՝ փորձելով պատկան մարմինների ուշադրությունը սևեռել իր վրա:

Այնինչ, արդյունքում, 2015-ի դեկտեմբերի 17-ին՝ Արմավիրի մարզի ընդհանուր իրավասության դատարանը որոշում է կայացրել դատապարտել նրան 1 տարի 6 ամսվա ազատազրկման: Տիկին Գայանեի խոսքով՝ ազատազրկման մեջ եղած ժամանակահատվածում որդու առողջությունն ավելի է քայքայվել, այն դեպքում, երբ նա պետք է շարունակաբար վերականգնողական բուժումներ անցներ:

Սոնա Հարությունյան