Լենա Նազարյանի ելույթի ժամանակ սարկազմի տարրերը հիշեցնում են Սերժ Սարգսյանի խոսքերը. Լուիզա Սարգսյան

Սեպտեմբերի 19-21-ը Սանկտ Պետերբուրգում անցկացվեց համաժողով, որտեղ ելույթ էր ունեցել ՀՀ վարչապետի կինը՝ Աննա Հակոբյանը և ելույթում խաղաղության կոչ էր արել՝ շեշտադրելով, որ հայ կանայք չեն սիրում վրեժ և նույնիսկ հայ որդեկորույս մայրերը խաղաղության են ձգտում։ Այսօր խորհրդարանում այս մասին հիշեցրեց ԲՀԿ կուսակցության պատգամավոր Լուիզա Սարգսյանը։

«Կարծում եմ, որ նման համաժողովներին մասնակցելիս կին քաղաքական գործիչները պետք է ևս մեկ անգամ իմաստավորեն իրենց գործունեությունը և արժևորեն իրենց խոսքի ուժն ու նշանակությունը, բայց պատվիրակությունը վերադարձավ և ԵԼՔ խմբակցության ղեկավար տիկին Լենա Նազարյանը բազմաթիվ հարցազրույցներով սկսեց հանդես գալ, քաղաքական կանխատեսումներ անել արտահերթ ընտրությունների վերաբերյալ՝ թիրախավորելով անձերի և կուսակցությունների։ Ոչ մի տեսակի կայունության և խաղաղության շեշտադրում ես չտեսա»,-ասաց Լ․ Սարգսյանը։

ԲՀԿ պատգամավորը նաև նշեց, որ իրավիճակը հասավ նրան, որ սկսեց շրջանառվել այս նախադասությունը․ «Որ պատգամավորի մտքի հետ չհամաձայնվեն, մարդիկ կգնան նրանց բակի, տների դռների մոտ»։

«Օրենսդրի հարգարժան ներկայացուցիչներ՝ կարծում եմ՝ այս դահլիճով չէ, որ ձեզ պետք է հիշեցնեի, որ տարբեր օրենքներով կա իրավակարգավորում մարդու անձնական կյանքը հարգելու մասին, բայց ես հիշեցնում եմ, որ այդ օրենքները գոյություն ունեն, հիշեցնում եմ, որ բնակարանները կուսակցական գրասենյակներ չեն, հանրահավաքների, ժամանցի վայրեր չեն, այդ բանակարաններում ապրում են մարդկանց տարեց ծնողները, անչափահաս զավակները, իսկ ոչ մի երեխա ծնողի արարքի համար պատասխան չի տալիս։ Նույնիսկ ստալինյան ժամանակներում "Сын за отца не отвечает" լոզունգը գործում էր»,-նշեց պատգամավորը։

Նա նկատեց, որ թիրախավարելով ԲՀԿ կուսակցությանը, շահարկելով 7 տոկոսը ավագանու ընտրություններում՝ Լենա Նազարյանի ելույթի ժամանակ սարկազմի տարրերը հիշեցնում են Սերժ Սարգսյանի խոսքերը՝ «7 տոկոս ձևավորած քաղաքական ուժը չի կարող խորհրդարան ձևավորել»։

«Մենք նրա համար ենք, որ երկրի և՛ արտաքին, և՛ ներքին քաղաքական կյանքում կարողանանք մտցնել կոռեկտություն, հանդուրժողականություն, մեկս մյուսին հարգելու և բանակցելու ունակություն»,-նշեց Սարգսյանը։