ԱԺ-ում տեղի ունեցածն ակնհայտ ապօրինություն է․ Էդմոն Մարուքյան

Ազգային ժողովը 61 կողմ ձայով ընդունեց ԱԺ կանոնակարգ օրենքում փոփոխություններ կատարելու մասին նախագիծը։ Այս մասին ԱԺ-ում լրագրողների հետ զրույցի ժամանակ ասաց ԵԼՔ խմբակցության պատգամավոր Էդմոն Մարուքյանը։

«Առավոտից մենք ասում ենք, որ այս նախագիծն ընդունում են նրա համար, որ վարչապետի հրաժարականի պարագայով խորհրդարանը ցրելու ընթացակարգը խափանվի, իսկ նրանք ասում են ոչ՝ դրա համար չէ, ասում են՝ ուղղակի, դա մի ուժ է արել։ Մենք տեսանք, որ բոլոր ուժերը կապ ունեն բացի ԵԼՔ-ից և 61 կողմով ընդունվեց օրենքը, բայց ես կրկնում եմ՝ եթե 14 օրվա ընթացքում վարչապետը չի ընտրվում հրաժարականից հետո, ուրեմն խորհրդարանը օրենքի ուժով, իրավունքի ուժով արձակվում է»,-նշեց Մարուքյանը։

Էդմոն Մարուքյանի խոսքով դա ակնհայտ ապօրինություն է, քանի որ քվեարկությունն անցկացվել է առանց քարտերի ու առանց նիստի ուղիղ հեռարձակման։

Էդմոն Մարուքյանը նաև նկատեց, որ սա դեռ օրենքում փոփոխությունների ընդունում չէ, քանի որ այն պետք է ստորագրվի նախագահի կողմից մինչև ուժի մեջ մտնելը։

Նշենք, որ հրավիրած արտահերթ նիստից առաջ «Ելք» խմբակցության ղեկավար Լենա Նազարյանը վերցրել է պատգամավորների քարտերը, որպեսզի քվեարկություն տեղի չունենա, սակայն որոշվեց այն անցկացնել ձեռքով։