Արդարադատության նախկին նախարարն անխուսափելի է համարում Հայաստանում արտահերթ խորհրդարանական ընտրությունները

Արդարադատության նախկին նախարար Հովհաննես Մանուկյանը կարծում է, որ Հայաստանում արտահերթ խորհրդարանական ընտրությունների անցկացումն անխուսափելի է:

Այս մասին Հովհաննես Մանուկյանը լրագրողներին ասել է Բաղրամյան պողոտայում բողոքի ակցիայի ժամանակ:

«Ժամանակը ցույց է տալիս, որ այս հեղափոխության ժողովրդի ալիքի դեմ որեւէ խոչընդոտ չի կարող լինել: Որեւէ հանճարեղ իրավական լուծում ժողովրդի կամքի դեմ չի կարող լինել: Իրավիճակը գնահատում եմ որպես հերթական փոքրիկ խոչընդոտը ժողովրդական ալիքի, ժողովրդական ընդվզման, ժողովրդի ցանկությունների հաղթանակի դեմ եւ կարծում եմ՝ սա շատ արագ կհաղթահարվի եւ մեր երկիրը դինամիկ ձեւով կշարժվի դեպի արտահերթ ընտրություններ»,-անդրադառնալով ստեղծված ներքաղաքական իրավիճակին՝ կարծիք հայտնեց արդարադատության նախկին նախարարը:

Հովհաննես Մանուկյանի խոսքով՝ որեւէ մեկի, այդ թվում՝  խորհրդարանում  ներկայացված ուժերի համար գաղտնիք չէ, որ այսօրվա խորհրդարանը չի արտահայտում հասարակության քաղաքական համակարգը:

 «Վաղ թե ուշ այս պրոցեսը պետք է կայանա, արտահերթ խորհրդարանական ընտրությունները պետք է դառնան իրականություն՝  որքան շուտ, այնքան լավ մեր երկրի եւ քաղաքական համակարգի առողջացման համար»,- եզրափակեց Հովհաննես Մանուկյանը:

Հայաստանի Հանրապետության վարչապետ Նիկոլ Փաշինյանի կոչով քաղաքացիները հավաքվել են Ազգային ժողովի շենքի մոտ: «Ֆեյսբուք»-ի ուղիղ եթերում ՀՀ վարչապետը նշել էր, որ ինքը տեղեկություն է ստացել, որ ՀՀԿ-ն ԱԺ արտահերթ նիստ է հրավիրել և պատրաստվում է կողմ քվեարկել ԱԺ կանոնակարգ օրենքում փոփոխությունների նախագծին, որի համաձայն՝ Ազգային ժողովի նիստի աշխատանքները որևէ պատճառով խոչընդոտելու դեպքում այն կարող է ընդհատված համարել: Ազգային ժողովն արտահերթ նիստում 67 կողմ ձայնով ընդունեց Ազգային ժողովի կանոնակարգ-օրենքում փոփոխություններ կատարելու մասին օրենքի նախագիծը: