Հաքերները գողացել են Nvidia ընկերության 400 հազար օգտատերերի գաղտնաբառերը. Los Angeles Times

Համաշխարհային Մամուլ 16 Հուլիս, 2012 12:16

Հաքերները կոտրել են Nvidia ընկերության 400 հազար օգտատերերի գաղտնաբառերը։ Nvidia ընկերությունը զբաղվում է կապի ոլորտում տեխնոլոգիաների զարգացմամբ։ Ընկերությունը, որը սարքավորումներ է արտադրում նաև Apple և Google ընկերությունների համար, հաղորդել է, որ այս ամսվա ընթացքում ընկերության կայքերը և դրանց օգտատերերի գաղտնաբառերը մի քանի անգամ հաքերական հարձակման են ենթարկվել։

Ընկերության ներկայացուցիչը Los Angeles Times–ին տված հարցազրույցում, հայտարարել է, որ ընկերությունը հետաքննություն է իրականացնում և ստիպված է արգելափակել 5 կայքերը։

Ընկերության ներկայացուցիչը հայտարարել է, որ անվտանգության նկատառումներից ելնելով՝ կարգելափակվեն ընկերության արտադրանքը առցանց վաճառքի դրվող Nvidia Board Store, Nvidia Gear Store կայքերը, ինչպես նաև ընկերության կարևոր նշանակության մի քանի այլ կայքեր։

LA Times–ի լրագրողի հարցին՝ ինչպիսի միջոցներով են հաքերները կոտրում կայքերը, ընկերության ներկայացուցիչը պատասխանել է՝ «մենք այդ ուղղությամբ ջանքեր ենք գործադրում, թեև աշխատանքները դեռ չեն ավարտվել»։

Nvidia ընկերության կայքերի վրա հաքերական հարձակումները լայն հնչեղություն ստացած վերջին խոշորամասշտաբ հարձակումներ են։

Անցյալ շաբաթ հաքերական հարձակման էր ենթարկվել Yahoo! որոնողական համակարգը, ինչի պատճառով 450 հազար օգտատիրոջ գաղտնաբառ էր կոտրվել։ Բացի այդ, հաքերները վերջերս կոտրել էին Formspring սոցիալական կայքը։

Անցյալ ամիս հաքերական հարձակման վտանգի տակ էին հայտնվել LinkedIn կայքի 6.5 միլիոն օգտատեր: