Իրանը Գերմանիայի տարածքն օգտագործում է Դամասկոս զենք մատակարարելու համար. La Stampa

Սաուդյան հատուկ ծառայությունները բացահայտել են, որ Իրանը, շրջանցելով պատժամիջոցները, Ասադի ռեժիմին քաղաքացիական օդանավերով զենք է մատակարարում և դրանք տեղ հասցնելու համար օգտագործում է Գերմանիայի օդային տարածքը, գրում է La Stampa–ն։

«Էր–Ռիադը հատուկ հետախուզական խումբ է ստեղծել՝ Թեհրանի կողմից Դամասկոսին տրամադրվելիք օգնությունը կանխարգելելու համար, և ավելին՝ կանխել Իրանի և նրա լիբանանյան դաշնակից «Հիզբոլահ» խմբավորման կողմից Մերձավոր Արևելքում թշնամական սուննի երկրների գաղտնի ցանցի ստեղծումը։ Խումբը փաստաթուղթ է պատրաստել, ըստ որի Թեհրանը թեթև զինամթերք, հետախուզական սարքավորումներ, հրթիռային թողարկման սարքավորումներ, երբեմն էլ նույնիսկ հրթիռներ է մատակարարում՝ Իրանի ազգային ավիափոխադրող Iran Air ավիաընկերության օդանավերով, ինչպես նաև Mahan Air և Yas Air փոքր ավիաընկերությունների օդանավերով։ Զենքի մատակարարումն իրականացվում է Իրանի հեղափոխական գվարդիայի ղեկավարության հսկողության ներքո, որի էլիտար «Ալ-Կուդզ» ստորաբաժանումը գտնվում է Իրանի հոգևոր առաջնորդ Ալի Համենեի անմիջական հսկողության ներքո, գրում է պարբերականը։

«Զինամթերքը տեղափոխվում է Թեհրան–Դամասկոս չվերթ իրականացնող Airbus A300 և Airbus A310 օդանավերով։ Բեռնափոխադրումները խախտում են ՄԱԿ–ի կողմից Դամասկոսի դեմ կիրառվող պաշժամիջոցները, թեև միջազգային հանրության ճնշումները չեն կարող ազդել դրանց վրա, քանի որ Իրանի և Սիրիայի միջև ուղիղ չվերթ է իրականացվում, և երկու երկրների միջև ամուր քաղաքական կապեր են գործում։ Սակայն վերջին ամիսների ընթացքում Դամասկոսի պահանջով ավելացել է զենքի մատակարարումը՝ Թեհրան–Դամասկոս և Թեհրան-Բեյրութ չվերթներով, քանի որ մատակարարվող զենքի խմբաքանակը չի բավականացնում Ասադի ռեժիմին ենթակա ուժերին։ «Ալ-Կուդզի» որոշման համաձայն, Ասադի ռեժիմին զենք է մատակարարվում նաև այլ չվերթներով։ Մասնավորապես Iran Air ավիաընկերությունը զենք է մատակարարում Գերմանիայի միջոցով։ Իրանը օգտագործում է Ֆրանկֆուրտի, Քյոլնի և Համբուրգի տերմինալները. զինամթերքով բեռնավորված իրանական ուղևորատար օդանավերը չվերթ են իրականացնում Գերմանիա, որտեղից թռչում են Դամասկոս։ Բեռների ծավալներն այնքան մեծ են, որ Էր–Ռիադը մտադիր է դիմել Բեռլինին և այլ եվրոպական երկրներին՝ Iran Air–ի նկատմամբ ճնշումները մեծացնելու համար։», – գրում է La Stampa–ի հոդվածագիր Մոուրիցիո Մոլինարին։

Ըստ հոդվածագրի, Գերմանիան մինչ այժմ այդ ուղղությամբ որևէ քայլ չի ձեռնարկել այն պատճառով, որ ՄԱԿ–ը և ԵՄ–ը պատժամիջոց կիրառելու հատուկ որոշում չեն ընդունել։