Վարկային համաձայնագրի դրույթները չեն հակասում ՀՀ օրենքներին

ԱԺ արտաքին հարաբերությունների մշտական հանձնաժողովը Արմեն Ռուստամյանի նախագահությամբ այսօր ԱԺ նիստի ընթացքում քննարկեց 2011 թվականի հուլիսի 13-ին Լոնդոնում ստորագրված «Հայաստանի Հանրապետության կառավարության եւ Մեծ Բրիտանիայի եւ Հյուսիսային Իռլանդիայի Միացյալ Թագավորության կառավարության միջեւ եկամուտների եւ կապիտալի կրկնակի հարկումը բացառելու եւ հարկումից խուսափելը կանխելու մասին» կոնվենցիան, որը ներկայացրեց ՀՀ ֆինանսների փոխնախարար Սուրեն Կարայանը:

Փոխնախարարը նշեց, որ կոնվենցիայի նպատակն է բացառել եկամուտների եւ կապիտալի կրկնակի հարկումը եւ այդպիսով նվազեցնել նշված հարկերի հետ կապված խոչընդոտների բացասական ազդեցությունը միջազգային առեւտրի եւ ներդրումների վրա եւ ստեղծել կանխատեսելի եւ կայուն հարկային դաշտ:

ՀՀ ֆինանսների փոխնախարար Սուրեն Կարայանը նաեւ ներկայացրեց 2011 թվականի հուլիսի 14-ին Դուբլինում ստորագրված «Հայաստանի Հանրապետության կառավարության եւ Իռլանդիայի կառավարության միջեւ եկամուտների եւ գույքի կրկնակի հարկումը բացառելու եւ հարկումից խուսափելը կանխելու մասին» համաձայնագիրը: Ըստ Սուրեն Կարայանի` համաձայնագրի նպատակն է բացառել եկամուտների եւ գույքի կրկնակի հարկումը եւ այդպիսով նվազեցնել եկամտային եւ գույքային հարկերի հետ կապված խոչընդոտների բացասական ազդեցությունը միջազգային առեւտրի եւ ներդրումների վրա:

2011 թվականի նոյեմբերի 1-ին ստորագրված «Հայաստանի Հանրապետության եւ Վերակառուցման եւ զարգացման միջազգային բանկի միջեւ «Ոռոգման համակարգերի վերականգնման հրատապ ծրագրի լրացուցիչ ֆինանսավորում» վարկային համաձայնագիրը ներկայացրեց ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը: Նա նշեց, որ վարկային համաձայնագրի դրույթները չեն հակասում ՀՀ օրենքներին եւ այլ նորմատիվ իրավական ակտերին:

ՀՀ տարածքային կառավարման նախարարության ջրային տնտեսության պետական կոմիտեի նախագահ Անդրանիկ Անդրեասյանը ներկայացրեց «2011 թվականի հուլիսի 14-ին ստորագրված` Հայաստանի Հանրապետության եւ Վերակառուցման եւ զարգացման եվրոպական բանկի միջեւ «Հայաստանի փոքր համայնքների ջրային ծրագիր» վարկային համաձայնագիրը: Պարոն Անդրեասյանը նշեց, որ համաձայնագրի նպատակն է օժանդակել ՀՀ Տավուշի, Լոռու, Շիրակի, Գեղարքունիքի, Կոտայքի, Սյունիքի համայնքներում եւ Վայոց Ձորի մարզում համայնքային ջրամատակարարման բարելավման եւ ջրի մաքրման կայանների եւ կոյուղու կոլեկտորների վերակառուցման գործում:

ՀՀ ազգային անվտանգության ծառայության տնօրենի առաջին տեղակալ Ռոմիկ Հարությունյանը ներկայացրեց 1994 թվականի մարտի 15-ին Երեւանում ստորագրված «Հայաստանի Հանրապետության եւ Ռուսաստանի Դաշնության միջեւ Հայաստանի Հանրապետության տարածքում գտնվող Ռուսաստանի Դաշնության սահմանապահ զորքերում Հայաստանի Հանրապետության քաղաքացիների համալրման եւ զինվորական ծառայություն անցնելու կարգի մասին» համաձայնագիրը: Ռոմիկ Հարությունյանը նշեց, որ համաձայնագիրը նպատակ ունի կանոնակարգել ՀՀ տարածքում գտնվող Ռուսաստանի Դաշնության սահմանապահ զորքերում ՀՀ քաղաքացիների` պայմանագրով ու զինակոչով համալրելու եւ զինվորական ծառայություն անցնելու կարգը: Ըստ պարոն Հարությունյանի` ՀՀ ազգային անվտանգության ծառայությունը նպատակահարմար է գտնում համաձայնագրի վավերացումը:

2011 թվականի մայիսի 26-ին Լայպցիգում ստորագրված «Հայաստանի Հանրապետության կառավարության եւ Գերմանիայի Դաշնային Հանրապետության կառավարության միջեւ ավտոմոբիլային ճանապարհներով միջազգային ուղեւորափոխադրումների եւ բեռնափոխադրումների մասին» համաձայնագիրը ներկայացրեց ՀՀ տրանսպորտի եւ կապի նախարար Մանուկ Վարդանյանը: Նախարարը նշեց, որ համաձայնագրի նպատակն է իրավահավասար եւ փոխշահավետ սկզբունքների հիման վրա դյուրացնել եւ կանոնակարգել իրենց երկրների միջեւ եւ իրենց տարածքների տարանցմամբ ավտոմոբիլային ճանապարհներով իրականացվող միջազգային ուղեւորափոխադրումները եւ բեռնափոխադրումները:

Քննարկված հարցերը հանձնաժողովի դրական եզրակացությամբ կներկայացվեն խորհրդարանի վավերացմանը: