Կա՛մ ազատ արձակեք, կա՛մ գնդակահարեք. ցմահ դատապարտյալի հարազատները բողոքում են

Այսօր` սեպտեմբերի 13-ին, ՀՀ կառավարության շենքի մոտ բողոքի ակցիա էին իրականացնում ցմահ դատապարտալ, արդեն 23 տարի 8 ամիս պատիժը կրող Աշոտ Մանուկյանի հարազատները: Եղբայրները նամակ փոխանցեցին վարչապետին՝ հույսով, որ վերջապես արձագանք կստանա եղբոր ճակատագիրը և ազատ կարձակվի:

Վերջին դատավարությունը մոտ 20 օր առաջ էր, բայց եղբորս ազատ չարձակեցին, նշում է Արթուր Մանուկյանը, ով ցմահ դատապարտյալ Աշոտ Մանուկյանի եղբայրն է: «Մենք հույս ունեինք, որ նրան ազատ կարձակեն: Նրա մոտ դրական տեղաշարժ կա, սպանվածների հարազատներն անգամ նրան ներել են, միայն ՀՀ- ն չի ներում»:

Ազգականների խոսքով՝ նրանք կանգ չեն առնի, հիմա դիմում են վարչապետին ու Արդարադատության նախարարին, բայց, հարկ եղած դեպքում՝ կհասնեն մինչև Եվրոպական դատարան: Արթուր Մանուկյանը նշեց, որ վերջին դատավարությունից հետո եղբայրը փոքր ինչ ընկճված է եղել, բայց իրենց հորդորների արդյունքում ամեն ինչ կարգավորվել է: «Հույս ունենք, որ այսքանով ամեն ինչ կավարտվի ու Աշոտը շուտով ազատության մեջ կլինի»- նշեց Արթուր Մանուկյանը:

Բողոքի ակցիային ներկա էր նաև ցմահ դատապարտյալի մայրը. «Միայն արդարություն են ուզում՝ օրենքի կետերով։ Արդեն 24 տարի՝ հույսով սպասում էինք, որ որդուս ազատ կարձակեին, սակայն նորից մերժեցին»,- ասաց Աշոտ Մանուկյանի մայրը։

Նշենք, որ անձամբ Փաշինյանին նամակը չկարողացան հանձնել, բայց համապատասխան գերատեսչությունից վստահեցրին, որ նամակն անպայման կփոխանցեն:

Մանուկյանը դատապարտվել է 20 տարեկանում: Թե՛ նախաքննության, թե՛ դատավարության ժամանակ ցուցմունքներ է տվել, որ ինքն է կրակել երեք զինվորների վրա, իսկ պատճառը եղել է պարտքի շուրջ եղած վեճը։ Մանուկյանին դատապարտել էին մահապատժի՝ գնդակահարության ձևով, պատժի նմանատիպ կիրառումը, սակայն, վերացվեց, և արդյունքում, Մանուկյանը 22 տարի անազատության մեջ է։